文：洛迪高@世界波

智利球星阿歷斯山齊士（Alexis Sanchez）由阿仙奴7號過底做曼聯7號，過程擾攘咗大半個一月轉會窗。英國有傳媒報道A山其實曾諗過同阿仙奴續約，但自從去年二月歐聯作客拜仁慕尼黑，兵敗1:5後就已起離心，直到去年夏天轉會窗，A山差啲以6,000萬英鎊轉投曼城，相信兵工廠上下，以至球迷都知A山離廠只係日子問題，去到1月，A山喺曼市雙雄之間做選擇，隊友們似乎都早有心理準備，甚至有報道指想A山早走早著，然而A山與隊友不和，冰封三尺卻非一日之寒……

筆者在此綜合唔少英國傳媒報道，嘗試重組一下案情，揭示A山做逃兵嘅始末。

終章的開端

A山喺場上表現喜怒形於色，佢會為球隊贏唔到波而表現得好激動，令佢比起其他隊友，睇嚟更有鬥心，更希望為球隊戰鬥，但過猶而不及，太過火嘅表現，又會顯得佢自我，而呢樣情況喺佢合約問題遲遲未解決時，就會因為引起炒作而影響球隊。

喺對上10個月，呢種氣氛亦睇嚟影響到A山同隊友關係，而一切就係由上年3月，阿仙奴對碰利物浦開始。A山當日做後備，每日電訊報Matt Law同Jeremy Wilson就講過呢個決定係因為A山同隊友發生衝突，原因係因為喺賽前一次操練時被踢跌，智利球星就徑直離開訓練場，令隊友們相當不滿，甚至當面質疑佢嘅態度，而擅自離開操練場，喺阿仙奴唔係罕見，而嗰啲球員都無被罰……

失落曼城

去年夏天，因為阿仙奴無足夠時間搵替代品，所以選擇留下A山，而兵工廠就希望用餘下時間吸引A山續約，但原來有隊員認為球會應該把握機會套現，而嚟到今日，就證明咗佢哋係正確嘅。及後當兵工廠於十月對愛華頓時，A山於比賽中對艾朗藍斯（Aaron Ramsey）一記傳球失誤扯晒火，而之後對曼城嘅比賽時，A山巧合地就算藍斯有絕佳埋門位置，A山都無畀波佢，不過低處未算低。

隊友失和

慢慢地，隊友們開始孤立山齊士，但高斯尼似乎繼續努力，希望可以好好令山齊士再融入球隊，但有球會內部消息指，山齊士已經唔止一次於練習途中離場了。 因此對唔少阿仙奴球員嚟講，山齊士一月轉會唔係一件壞事。

據衛報記者David Hytner講，於阿仙奴喺11月以1:0擊敗般尼後，有資深隊員當住山齊士臉，指好厭惡佢場上行為，就好似成日揚手表達對隊友嘅不滿。之後喺對修咸頓比賽中，韋舒亞（Jack Wilshere）就指責A山成日浪費咗控球權，然後比水晶宮時，有部份球員亦無去慶祝A山嘅入球。喺佢哋眼中，山齊士已經越嚟越難相處，尤其是山齊士有時情緒會變得好緊繃。但佢嘅實力擺在眼前，阿記球員都希望A山可以改，但其實佢哋都感覺到，佢嘅離開已係無可避免。

已無退路

A山喺往後日子，有傳媒形容佢練波就好似淨係想練好自己，而唔係著重同球隊訓練，佢自己練習嘅時間比同隊波練習更多，而隊友同佢嘅交流亦越嚟越少，就更加唔洗講同隊友嘅聯誼了，到最後，山齊士繼續穿上紅色波衫，但喺佢住緊嘅，唔再喺倫敦，而係曼徹斯特市。

山齊士喺14年由巴塞轉會阿仙奴，都係因為被尼馬（Neymar）壓縮上陣時間，佢為力爭上陣機會而毅然應徵當兵，當時佢講過，我嚟呢度(阿仙奴)係為咗贏英超同歐聯，仲有世界上可以贏嘅冠軍。佢離開酋長球場時，無緣染指歐聯英超，而朋友似乎亦唔多。最後，佢嘅冠軍夢，似乎就由曼聯球迷去好好一齊暢想。

（文章純屬作者意見，不代表香港01立場。）