世上只有媽媽好，但假如你爸是特首，那一樣可以像個寶，而且是超然於機場保安和反恐措施上的好寶寶。

據報道，上月特首梁振英幼女梁頌昕打算由香港飛三藩市，點知入閘後先發現手提行李留咗喺禁區出面。但咪錯怪頌昕大頭蝦，因為原來必須由本人親自到禁區外取回行李並重新辦理出境手續呢項基於保安考慮嘅規定，只適用於你同我呢啲凡夫俗子，而特首千金不但唔使出返禁區，仲有專人攞埋件行李入嚟畀佢，真係力水都慳唔少。

包龍星都識講「天子犯法與蔗民同罪」，咁都有得用特權，仲成世界嘅？鬧還鬧，但據講航空公司職員原本係唔制的，就算以特殊人員身分陪同入閘嘅香港第一夫人梁唐青儀當面叫到，都企硬 Say No，於是頌昕「唯有」打畀 Daddy 求救啦（其實自己行返出去攞都得嘅。）

據稱，頌昕當時隊咗個電話畀嗰位「唔識做」嘅職員，個職員知係佢老豆，就叫咗聲「梁生」咁，但對方立即糾正話：「叫我梁特首。」（好大嘅官威呀！）之後事件驚動高層，機管局決定「特事特辦」，就搵人直接送件行李入去畀頌昕小姐了，完。

延伸行動

下次搭飛機，記得攞埋件手提行李入閘喇（雖然正常人好難唔記得。）