寒冬嘅時候，每個上車嘅乘客都戴上冷帽，圍巾遮口，性別年齡身材外貌統統歸一，人人都包到粽咁樣，由上車到落車，都唔知載咗咩人。

兩團羽絨喺協和街上車，講低去海濱道公園之後就自說自話，聲音低微，我亦樂於專心揸車。忽然一把低沉嘅聲線響起：

喂，你又刮到我喇，好痛呀。

另一把沙啞嘅聲音一邊清喉嚨一邊講：

唔小心啫，俾我睇睇。

整損咗，俾你睇完都唔會好返㗎啦。唔得，一定要幫你剪指甲。

低沉嘅聲音發出剪甲命令後，兩句「唔好」同時響起，分別來自沙啞聲同我心聲，可惜同樣宣告無效。

唯一慶幸嘅係，我聽到撕開紙巾包裝嘅聲音，希望唔好留低任何嘢啦。令人牙齦發酸嘅喀喀聲清脆俐落，可惜溫馨嘅行為喺唔適當嘅處所進行，只會令人覺得反感。

睇住呀，好痛呀，唔好剪咁深啦。

喉嚨痕得很嘅聲音，低訴住指尖嘅痛楚，都唔及我面對可能要徒手清潔車廂嘅恐懼。擔心還擔心，剪甲聲繼續一喀喀咁震撼住我嘅身心，我開始幻想緊綑住黑邊嘅粗厚指甲，一小片一小片咁隨住指甲鉗飛舞而四濺，雪白嘅紙巾攤開，偏偏啲指甲一一逃離佢嘅包圍……燈號轉綠，後車馬上響安失意，一秒都唔等得咁，令我唔敢再諗。

真係好痛呀，我自己剪啦。

唔得，你自己剪同無剪都無分別嘅，唔得呀，一定要我剪。

堅持嘅聲音低沉而堅定，痛楚嘅呻吟聲斷斷續續咁傳來：

唔好剪咁深啦，夠喇，喂喂喂，唔好。

無晒喇，咁我點撩鼻呀。

指甲由有到無嘅淒楚，又真係幾可憐嘅，希望佢哋會執齊垃圾啦。

抵達目的地嘅時候，其中一個羽絨人先行落車，令一個就俾錢。沙啞嘅聲音重現：

唔好意思，五百蚊有無得找？

又係呢個問題，我無論有無散紙，都會反問乘客：

好似無喎，你有無散紙呀。

而八成人都係有散紙嘅，呢位聲線沙啞嘅人亦都唔例外，掏出一張一百蚊俾錢。收錢嘅時候我特意觀察佢嘅指甲，驟眼睇真係貼晒手指，睇唔到較為深白色嘅指甲，唉，可憐。

所有乘客落車之後，我馬上掉頭停低部車，開燈檢查後座。一入所料，大部分指甲碎雖被清走，膠地毯上面依然有一兩片指甲碎，喺昏黃嘅車廂燈下發出慘白色，諗諗都嘔心。好彩唔係液體，成張地毯拎出車外反轉凳兩下就算。臨上車時，見到對面海濱道公園嘅圓形公廁，順便解放一下先啦。

入到廁所，忽地傳來熟悉嘅低沉聲音：

剪咗咪幾好，唔會刮到我喇。

你舒服就算啦。

沙啞嘅聲音依舊，呢把聲真係唔會認錯。明明廁所入面半個人影都無，突如其來嘅聲音不禁令我打個冷震，拿拿聲洗完手就離開，費事耽誤人哋嘅正事。當我留意緊有無路人會成為下個乘客時，見到另一個全身包裹喺羽絨入面嘅身軀，帽同頸巾令佢男女難分，衍生咗另一個問題，究竟頭先對乘客係分別係男定女？我唔敢再深究落去。

（本文純屬作者意見，不代表香港01立場。）