文：發夢媽媽

早前忙著大掃除，工程浩大，卻遇上3子都停課。太大工程的他們幫不了，我也心急希望省時完成沒叫他們幫。到了年三十，看見他們玩了整個上午也毫無停工之意，便想到叫他們也為自己的玩具來一次大掃除！

這次大掃除，並非徒托空言，因為除了為LEGO洗白白之餘，還得重新逐顆分類！一開始，3子興奮不已，非常積極，甚至互相加油。但整個過程，絕不簡單，歷時2.5小時的工程，對他們來說是考驗耐性耐力的時刻。加上我們四人之間的互動，實在是人性的反映，社會的縮影。

精警情節，節錄如下：

1) 二佬由一開初不斷說「我最鍾意抹嘢！」到中段已經開始魂遊太虛，躺在地上又再進入忍術修煉之境界。

2) 平時最主動收拾的三佬，任務只開始了廿分鐘便敵不過肚子餓的呼喚。由溫柔細心變成破口大罵，甚至停工抗議！

3) 大佬名副其實非常「大佬」，最初都是忙著做管工分配工作，口忙手不忙。但見孖寶開始有心無力，憐憫之心令他由嚴詞呼喝變成好言相向，呼風喚雨變成默默耕耘。工程得以完成，實在有賴這位大佬的堅持！

4) 孖寶全程斷斷續續都為不同原因哭哭啼啼了好幾次，時而互相安慰，時而互相指責。大佬則有時扇風點火，有時主持大局。

經典對白：

1) 二佬：「媽媽我好鍾意抹嘢，但係我可唔可以唔抹……」

2) 三佬：「咁我而家好肚餓，點抹呀？！D LEGO 咁重！」

3) 大佬：「你地唔好成日喊啦，咁有排分啦，咁不如我都喊啦！」

4) 三子邊分類邊說：

「不如我地一齊唔好理阿媽啦，就咁走唔好理啦！哈哈哈哈……」

「不如唔好再執啦，都係XX啦，叫咗你唔好放入口啦，唔係阿媽唔會話要執啦！」

「好攰呀！夠竟點解要執呀！」

至於我，「玩大咗」、「中伏」、「攞來搞」……等字眼不斷在腦海浮現，衝擊著我的意志和耐力。其實，真相是，我跟他們沒太大分別，都有肚餓、想走、想做自己嘢、想安慰人但又想破口大罵、想做管家但埋怨也一堆……

原來，一場大掃除，真正被訓練的，是我自己！

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）