羅天宇湯洛雯《愛回家》4年情終分手 同苟芸慧拍過拖又係見光死
前排湯洛雯IG po相就話要「took a deep breath and let it go」，粉絲即刻就問女神發生咩事係咪唔開心，能夠令女人唔開心通常都係因為感情事，近排靚湯出活動提起男友羅天宇，都因為工作太忙，大家都係send message好少見面，唔通感情亮起紅燈？就係因為呢個線索，竟然驚揭羅天宇同湯洛雯4年情斷，仲要原來已經分咗手4個月，真係不得不佩服大家咁強嘅摩擦力。
分手消息：
雖然盛傳就係因為陳瀅介入，但羅天宇先解釋大家係和平分手嘅，唔關陳瀅事，之後湯洛雯亦喺IG公佈分手，原因就唔講，但就唔關第三未事。但網民就唔太收貨，事關羅天宇個Record太花，前女友歷史輝煌，仲好睇過《愛．回家》入面個馬子仁。
先講第一個大家有印象嘅Coffee林芊妤，傳聞就係羅天宇嘅初戀，但可惜就發生咗殘廁Gathering事件，搞到滿城風雨，之後仲要有「朋友」報料將Coffee同羅天宇嘅親熱照唔小心流出，嚇到羅天宇鼻哥窿都冇肉，雖然Coffee就發晒誓話：「我唔係做新聞搏上位嘅人，啲相係我朋友放上去……。」但真相係點真係冇人知，淨係知呢段戀情就無疾而終。
之後就應該數到苟芸慧，傳聞苟姑娘最深得羅媽媽歡心，兩個人相差成4年，係姊弟戀，大家都唔太睇好佢哋，聽講仲話因為苟姑娘同羅天宇都係基督徒，兩個人「同居不同床」，導致最後分手收場。有報導指苟姑娘一直都想復合，仲行「奶奶政策」，時不時都搵羅媽媽談心，可惜羅天宇就分手要狠，頭也不回就走咗。
羅天宇拍《愛．回家》同入面做佢阿妹嘅蔣家旻走得好近，兩個就好似孖公仔咁出雙入對，唔知仲以為佢哋拍緊拖，傳咗好耐但佢兩個人都冇認到，觀眾就一於懶理，當「馬子仁」、「馬子妮」已經一齊咗，仲幾buy佢哋。
最Update嘅女友就梗係今日公佈分手嘅湯洛雯，兩個人同樣都係拍《愛‧回家》而撻著，但因為之前羅天宇曝光嘅戀情都冇好結果，佢哋就地下情咗3年，到上年10月終於公開，點知都仲係見光死，儘管靚湯漏過口風話想結婚，但都敵不過命運，羅天宇都係整定做娛樂圈浪子，一隻冇腳嘅雀仔。