一妹當關，不過係「公關」個「關」。

事關日前無綫《東張西望》派出攝製隊到兩度發生強烈地震（6.5及7.3級）嘅日本熊本縣「了解災情」，點知到咗重災區益城町先發現冇嘢食買，一名當地女士見佢哋肚仔餓，就送咗一大堆飯團過佢哋食。

本來一個盡顯災區充滿人情味嘅感人故仔（至少TVB以為係），播出後卻火速惹嚟全城怒插，狠批攝製隊明知去有機會糧食短缺嘅災區，都唔識帶多啲食物，反而要同災民搶飯（團）食，加深當地負擔。

查實早幾日，日本自己嘅關西電視台採訪隊，都試過喺災區油站打尖，最後自然要公開道歉平息眾怒。

反觀TVB，節目出街後第二日，網上鬧到火紅火綠，TVB班公關卻冇影！反而係女主持李旻芳出嚟擋箭，以一妹之力，喺自己 Facebook 專頁，獨對數以百計嘅無情批判。

據李小姐留言澄清（唔知點解要係佢澄清），原來當時閂機後，攝製隊已將食物還返畀嗰位女士，而播出片段亦只係想畀大家睇下日本災民守望相助嘅精神。重點係，李旻芳面對大家「如狼似虎」嘅指罵，仍能保持禮貌兼夾不停承諾會檢討，最後贏得唔少網民嘅同情：

「其實你都幾慘……公司派你去災區做野，已經夠慘，仲要你上晒身比人罵。係鬧都鬧你上面做決策果班啦」

「俾樓上咁多人Ｘ真慘，我都明你都係打份工，去採訪搵命駁重不討好，做細既又無得出聲」

「你老細對你地真係好」

「大台只係推佢一個去畀人公審，佢好忍得」

截至目前，雖然個post仍有近千個「嬲嬲」，但都有三百幾人讚好，正如另一位網友所言：「佢 EQ 咁高，有前途呀！」

延伸行動

參考完網民反應，支持TVB直接調李主持去做公關，然後拍個關公造型，包保有用過sell Tvbuddy，起碼有眼耳口鼻，同識講嘢。