《明報》執行總編輯姜國元，多年來以筆名「安裕」喺該報「星期日生活」寫專欄，講佔中講港獨而且居然唔係鬧異見者；2014 年頭條「爭普選大遊行　人數 10 年新高」被消失，據聞佢十分不滿；2015 年頭條「六四密件」變咗「阿里巴巴 10 億助港青創業」，據聞佢又十分不滿。於是 2016 年，他被解僱了（以上純屬事實陳述，絕無暗示因果關係。）

《明報》發聲明指，炒安裕係因為經營困難，要緊縮開支，而鍾天祥接見員工時亦重申呢個說法。鍾先生是來自馬來西亞的朋友，曾任《南洋商報》總編輯，據說立場愛國（不過唔係愛馬國而係另一個國），所以兩年前空降（咁佢真係坐飛機嚟嘛）做《明報》首席執行總編輯，第一日返工就俾成班同事問佢點睇六四。

安裕被唔少員工視為精神領袖，靈魂人物，今次被炒，佢哋自然十分不滿，除咗發起「貼牆行動」，喺明報工業大廈外牆貼滿 不明不白 字句嚟抗議，自然要搵鍾先生問個明明白白。鍾先生指公司要節省開支 8%（其實係 5%），所以唯有裁員，並根據年資長短、人工高低、表現好壞嚟決定炒邊個。有趣嘅係，鍾先生年資短過安裕，人工又全公司最高（佢自己講的），表現又有目共睹，所以據報道噚日有員工就兜口兜面問：「點解唔係你走？」而鍾先生就答：「如果你係老闆我會聽你講，可惜你唔係。」難怪班下屬咁鍾意佢。

重點係，鍾生話今次炒安裕只係「第一波」，似乎暗示「節省開支」活動陸續有嚟，但到底第二波第三波係乜嘢波，就要拭目以待。不過鍾生噚日都有一句講得唔錯：「希望大家好好努力，把《明報》做下去！」

延伸行動：

邏輯問題：為「慳錢」炒咗安裕，但如果因此降低公信力，流失讀者，係咪會令經營更困難呢？