星期六嗰晚，大師兄我同班師兄弟練完拳食埋飯，返到屋企扭開電視就已經做緊《G-1格鬥會》。郭思琳（Margiela）同唐紫睿（Hazel）兩位依舊照住之前幾場嘅「G-1戰鬥流程」去打，唔講真係以為有武術指導叫佢地咁打。當我以為場場都係咁樣樣嘅時候，小師妹叫我做人有少少耐性。好啦，星期日我決定畀多次機會睇多集，喂，又真係唔同喎，鄧穎芝（Vangie）同劉燕妮（Rika）打得有紋有路好多，終於似返樣。不過要數最爆嘅，都係Margiela同Hazel嗰場，爆嘅仲要唔係打嘅時候場面火爆……

Margiela VS Hazel

（片段：http://viu.tv/encore/g-1-fight-club#g1-fight-clube6hazel-vs-margiela，比賽時間為29分50秒至37分22秒）

講返咩叫「G-1戰鬥流程」先，簡單嚟講就係：搏拳—＞搏拳—＞出腳—＞出腳—＞搏拳—＞纏鬥一陣摔低咗、落到地打兩下—＞因為大家個姿勢（Posture）麻麻所以互相可以輕易穿越防守（Pass Guard）同出掃技（Sweep）、互相交換上下位、出降服技，成功就贏、失敗／時間夠下回合起身由搏拳再嚟過。技術係唔細膩，但我講過唔應該對班女仔要求太高。會有「G-1戰鬥流程」嘅出現並唔係單純關拳手技術事，更重要嘅係關教練制定嘅戰術事。

而最爆場面就係關教練事！大家以為打搏拳爆？降服爆？太天真啦！大家睇返33分40秒開始，兩邊教練同自己拳手講嘢嗰段。當時打完第一回合，間場休息，教練會喺呢個時候畀少少水拳手飲，按摩吓肌肉，消吓腫止吓血，仲會同拳手講返佢一陣應該做咩唔應該做咩。呢個時候拳手已經上氣唔接下氣，仲要俾人打咗輪，邊聽到咁多嘢吖？

好嘅教練呢個時候應該一針見血講畀拳手聽一陣要做咩，同唔好再做咩。如果本身贏緊，就話佢知繼續做，做得好，對手有咩習慣可以比佢捉到路；如果輸緊，就直接話佢知幾時應該做咩。

我地睇吓Margiela個教練做咗咩（34分14秒）。

做咩話佢知你輸力量呀？你想佢打大力啲就叫佢打大力啲；做咩反問佢「距離呢戰術呢」呀？阿教練你個拳手輸緊呀，個戰術你諗㗎，而家唔work呀個戰術，直接話佢知你要佢咩時候做咩啦！叫佢等人衝埋嚟打反擊又好，叫佢一開始就打摔打地戰又好，唔好畀問題佢諗啦！個拳手已經好亂㗎啦！仲要同佢講「一係就反擊，一係就輸」，小學生關聯詞作句「要麼—要麼」咩？

然後高潮嚟喇。個教練捉住Margiela個頭，又搖又打又拍！做咩事呀？你咁樣唔係激勵佢，係擊打佢！喂佢啱啱俾人打完一輪，你仲拍佢打佢把鬼咩？教練係咪睇戲睇太多呀？咁搖法唔暈都變暈啦！人地想抖吓你就打人，你直接同佢講做咩好過啦！

唔係話激勵拳手錯，但你激勵完人，都話畀人知做咩好吖。畀個例子吖，Rory MacDonald 對 Demian Maia 嗰場比賽（UFC170，大家可以搵吓嚟睇），MacDonald 第一回合就俾 Maia 喺地面控制咗成個回合，間場休息嗰時，佢教練就叫佢坐低少少個馬步，重心低少少，下回合開始，Maia 就摔唔低 MacDonald，結果立技較好嘅 MacDonald 就反敗為勝。呢種就係教練嘅威力。

間場休息就畀人塊面休息吓啦，仲拍佢你驚佢比人打唔夠咩？

Vangie VS Rika

（片段：http://viu.tv/encore/g-1-fight-club#g1-fight-clube7vangie-vs-rika-siu-kwan-vs-mimi，比賽時間為33分4秒至42分正）

講完嬲野，講吓好野吖。呢一場就真係似返樣啦。打拳唔一定係衝過去亂拳嘅，有距離有步調㗎嘛。

喺呢場入面，Rika 想打十字固（Armber）（如37秒5秒），同埋想做一個 Double Ankle Grab Sweep（34分30秒）。（41分03秒，旁述話係似十字固，但都幾明顯唔係，算啦，旁述頭幾集 Top 同 Mount 都未分好，家下已經好有進步，畀機會佢）。

喺防守狀態（Guard）入面打十字固呢，就唔係咩新奇事，而且仲有好多種方法。喺度講個最簡單嘅方法，就係先控制對方身體嘅姿勢（Posture），唔好比對方個身體太直太高。

睇吓1分40秒：用一隻腳去控制對方身體，俾力壓落去，等對方伸唔直個身，就會易打好多。嗱！我知嘅，老手一定想話，有其他方法喺防守狀態做十字固，我喺度講個簡單方法啫，唔係人人都識出 armbar sweep 同 helicopter armbar 嘛，就吓班新手啦。

以上教學就係 Rika 想打嘅 Double Ankle Grab Sweep。如果唔係 Vangie 穿咗隻手入去，真係差好少就掂。嗰時其實 Rika 可以用腳推 Vangie 個hip位，個Sweep就打得成。可惜呀！

【編按：相片為ViuTV《G-1格鬥會》節目擷圖。】

（本文純屬作者意見，不代表香港01立場。）