古語有云：「人類總要重複同樣的錯誤」，美容院又再發生涉嫌醫死人事故。

今次出事嘅美容院叫「娉婷國際」，英文名叫「Painting」。根據公司網站，4 年前開始提供標榜「活化大腦、自身療癒」嘅「系統化治療」，即係點？即係「從身體內在超過 5 兆億細胞入手…啟動自身療癒系統」，從而抗衰老，醫百病！

美容院成功吸引咗唔同疾病嘅患者參加療程，包括血癌、淋巴癌、胰臟癌、抑鬱症、皮膚病等等，參加者夾夾埋埋花咗起碼 500 萬，照照紅外線、吸吸氧氣和做做心靈輔導。但係就咁樣梗係醫唔好 cancer 啦，成個療程最特別嘅，就係要求參加者 24 小時戴住一款，聲稱有醫療成效的磁石。而且美容院職員會要求參加者簽承諾書，承諾唔會接受其他藥物或治療。

古有華佗嘗百草，今有磁石醫癌症。到底療程係咪真係有成效，警方同衛生署仲調查緊，暫時好難講。不過家陣有 7 個人報咗警，話接受完療程之後，健康反而仲差咗，甚至其中有兩個患癌嘅參加者已經過身。死咗人喎！於是警方尋日就以涉嫌串謀行騙罪拘捕 11 人，包括美容院老細。

美容療程同埋醫療療程之間，有好大嘅灰色地帶。美容院唔係正規醫療機構，又唔使申請牌照，「醫學美容顧問」亦唔係醫生，但係激光機、磨皮、肉毒桿菌、彩光、射頻……林林總總專業醫學技術，都可以喺美容院搵得到。今次已經唔係第一次有美容院出事架喇，記唔記得 2012 年嘅 DR 醫療集團「毒血針」事件？當年有 4 位女士為咗留住青春，參加咗 DR 嘅抽血培植療程，最後一死兩危殆。政府當年事後就成立咗個專責委員會，研究咗 12 個月點樣去監管美容業，但到而家都係唔使發牌零監管。政府唔負責，愛美麗嘅男士女士們就要自己小心，參加美容院療程之前金睛火眼睇清楚條款，三思而後行喇。

延伸行動： 你嘅老婆老公去美容，其實都係驚你唔愛佢。一於同伴侶講清楚：「我愛嘅係你嘅心，唔係你嘅身；你出咗事，我仲傷心！」