今晚九點半攪珠的「超級六合彩」，頭獎一注中將獨得1.5億港元，堪稱史上最高。1.5億自然好多（話唔多係博鬧），但認真計計條數，是否真的足以「打跛腳都唔使憂」，夠你歎一世？

前提：唔使做、有伴、活到80歲

首先，叫得「打跛腳唔使憂」，即是唔使做，唔投資，因為投資唔係必賺，買樓收租都有嘢煩，不符「唔使憂」的美妙境界，所以條數理應只計支出，不計可能收入。

其次，話明係「歎」，自然要長期保持一定生活質素，冇理由買幾層千萬豪宅然後日日捱飯盒，亦不能環遊世界餐餐米芝蓮但就返到香港住劏房。當然每人對「高質生活」有不同追求，野心家或覺得沒有權力的不是生活，御宅族可能覺得一世乜都唔做齋打機煲動漫已是幸福的全部，所以標準唯有由我定，務求以聽落好似好客觀及普遍適用為大前提。

由於標準由我定，而我深信識得歎，梗係要另一半陪你歎，所以所有費用以二人計。

最後，要計數，理論上都要知有幾長命，但如果太早蒙主寵召，又實在美中不足，很難話我「歎咗一世」，所以就當 30 歲中獎，歎到 80 歲吧（即 50 年），話晒笑喪。

開始計數。

衣

生活支出不外乎衣食住行。首先衣，泛指購物吧，但底衫底褲甚至最新手機在此 scale 下，價錢實在無關痛癢，所以只計最大鑊的「唔等使消費」。

我個人的興趣不算大鑊（都係數碼產品那些吧），但假如我有1.5個億，應該會想買些 designer furnitures 美化下間屋，例如 Knoll 嗰張 Barcelona Chair，就約 5 萬港紙左右；要係「高質生活」，兩個人每人每月買一次呢類嘢唔過份吧？另外每次換季，我或我另一半花 30 萬左右買時裝 items（其實僅約一個愛馬仕手袋價錢），一季一次，很合理吧？

(5萬 x 2次 x 12月) + (30萬 x 4季) = 每年 240萬240萬 x 50年 = 1.2億

1.5 億唔見咗 1.2 億，真係唔使計落去。唯有折衷啲，每月買一次唔等使嘢（5 萬），一年一次超級唔等使嘢（30 萬），應尚算是「入門級高質生活」水平吧？

(5萬 x 12月) + (30萬 x 1年) = 每年 90萬90萬 x 50年 = 4,500萬

仲有1.05億淨，可以講食了。

食

汲取以上教訓，一嚟就以「入門級」為標準吧。首先早餐支出係零，因為當我有1.5億又唔使做，係唔可能起身食早餐。午餐去國金軒食下點心或 Seasons by Olivier E. 之流，每人約 $200 至 $500 吧，計你平均 $350 x 兩個人 = $700。下午茶，半島 Lobby 都係 $600 兩位啫，預你一半日子半島級數，其餘時間 $150 個 tea（都好唔錯了），兩人平均每日 $450。

晚餐價錢差距較大，唐閣已算不錯（每人$800+），但與天空龍吟或廚魔仍有顯著距離（每人$2,000+）。當你每月 4 次 $800，兩次 $2000，其餘就每人 $300 嘅「OK dinner」吧，兩個人平均每月 $28,800。

($700 + $450) x 30日 + $28,800 = $63,300$63,300 x 12月 x 50年 = 3,800萬

係算唔上極豪，但最大鑊嘅「住」仲未計。先計「行」吧（都好大鑊）。

行

每 7 年換部車，50 年即係 7 部，「入門級高質」的車仔，每部平均 40 萬吧（例如我想要好耐但冇閒錢係唔可能買的 e-Golf）。

不過「行」亦包括旅遊，春天先去北歐仙境，跟團吧，每人約 5 萬；夏天南非試新酒睇動物，自由行 3 萬應有找；秋天地中海郵輪，Oceania Riviera 海景露台房每人 4 萬；冬天北海道二世谷滑雪，預鬆啲每人 3 萬吧（去過應知算好豪）。若每年皆去 4 次咁上下質素嘅旅行，加埋買車：

(7部車 x 40萬) = 280萬(15萬 x 2人 x 50年) = 1,500萬280萬 + 1,500萬 = 1,780萬

1.5億淨返約 5 千萬，唔錯，是時候買樓了。

未住，衣食住行仲有樣「必需品」未包，叫做醫療。有錢自然會買保險，亦要睇你到時係乜病，病幾耐，但預你 500 萬應已很保守（私家治癌兩年一般數十萬）。即淨返 4,500 萬買屋。又等等，你有錢唔係唔做慈善下話？撥 500 萬幫下 SPCA 好唔好？愛動物多過愛人？小朋友是未來的棟樑，撥多 500 畀 Save the Children 啦。

住

淨返 3,500 萬，點都夠買間別墅或兩、三個見得人嘅靚單位吧（一個過千萬喎）。我知之前冇計通脹（其實幾抵鬧，但我怕麻煩），但有三千幾萬物業，都唔會被拋離好遠嘅，最多「收尾幾年」放返出嚟吧，筆錢點都夠你「入門級高質」地玩到 80 歲。

所以結論係，1.5億，真係可以「打跛腳唔使憂」，歎過世。當然「你首先要中到六合彩頭獎」，但中唔到，用呢1.5億發個好夢，開心下，又無拘嘅。

（文章純屬作者意見，不代表香港01立場。）