王維基擬選立法會，唯一政綱係「換特首」。但以魔童的江湖地位與能力，做個「七十分之一」的立法會議員，未免浪費，不如索性劍指下屆特首寶座。唔好講笑，真係有分析指佢有此意，而不少網民亦已表支持，好似王生真係入咗閘一樣。不如又陪大家發下夢：如果王維基做特首，香港到底會有幾好？

王維基做特首，等如梁振英連任失敗

阿媽係女人我明，但呢個建樹實在太功德無量，不可不提。

創意產業有望百花齊放

選立會就話「唯一政綱換特首」啫，但選特首自然會有其他搞作，以佢十級淒慘嘅親身經歷，可以想像對各類創意產業持更開放態度必為主打競選承諾。鬼唔知有競爭才有進步，但提高創意產業自由，唔止係發多啲牌，唔止係唱緊 ViuTV 成功逼 TVB 變陣支歌仔，而係二次創作前唔使驚呢樣怕嗰樣，係任何題材都有權申請電影發展基金，係電台唔使為續牌下跪。

創新科技會真係有得做

冇 sense、冇遠見、冇諗頭，畀你開多十個局都冇用。維基搞新科技成績有目共睹，例如回撥式長途電話、瞓身推光纖入屋，以至唔少人睇死香港冇得做的網購。雖然唔係次次一帆風順，但勝在肯試新嘢，而唔係睇到人哋得咗，先急急跟風，仲要衰埋，然後再檢討點解人哋得你唔得。

旅遊業有望轉型

有版你睇，Nokia 同 Samsung 曾有能力撐起芬蘭同韓國幾乎五分一經濟，可見創新科技搞得掂，就有餘力幫旅遊業轉型，例如致力發展深度文化遊歷史遊甚至會展遊，吸引高增值過夜客，唔使再獨孤一味靠零售養全家。事實上王生都曾批評過香港旅遊業「開放過度」，搞到物價上漲，仲話應考慮設每日內地客上限，所以佢對旅業發展嘅立場應同唔少香港人幾啱 key。

官商勾結冇咁猖獗

冇錯，王生都係商界中人，但唔代表佢會同大財團同聲同氣。如前述，佢幾次重大痴線商業決定，唔係直接挑戰龍頭大哥利益，逼到 IDD 都要減價救亡，就係直頭同政府硬碰硬，查實今次忽然有意參選都可謂呢種性格嘅體現。當然政治是妥協的藝術，但以王生往績，有理由相信佢面對乜乜財團物物霸權都好，至少個頭都冇耷得咁低。

市民心理健康有望改善

以上種種或含推斷元素，但王生公關技巧高超就毫無懸念。阿爺繼續背後話事也好，施政一鑊粥都好，至少你呃我呃得有技巧啲，每日開電視唔使再聽到一系列豈有此理的金句，已經是很美妙的改變。

但好衰唔衰……

講到王特首曉飛咁，偉大程度就嚟拍得住金正恩同志，難道佢毫無缺點？當然唔係，而且一點就夠佢天堂跌落地獄，就是男人的原罪——好色。好像某周刊便曾爆料指佢 2011 年到上海公幹時涉嫌性侵同行女下屬，雖然已遭王氏否認，但佢 2008 年入亞視做咗十二日 CEO 期間，確曾發生「過分關心」當屆亞姐袁小曼胸部是真是假的問題，王氏亦已公開致歉。

傳聞幾分真幾分假都好，唔好意思，性醜聞就係永恆不變的從政大忌，民望高如克林頓都一鋪玩殘，而在性觀念相對保守的香港尤其驟忌。唐唐的故事我們記憶猶新，王生若真有意參選，或要先估算一下自己齋同性相關的黑材料已經有幾尺厚？

（本文純屬作者意見，不代表香港01立場。）