「大師兄有無睇過5打5 MMA?」「有呀，都幾年前㗎啦喎」「係咩?」「係呀，仲有個有地型㗎，可以掉人落街」「下?」

覺得普通1打1 MMA唔夠激，5打5夠激啦掛？其實唔係咩新鮮嘢，2014年就有，果時以為係俄羅斯嘅比賽點知原來係拉脫維亞。我奇怪嘅係去到上年原來都仲搞緊，去一去片比大家睇下個畫面（下面段片有少少暴力，敬請留意）：

無錯，創造力量同幻想，會嚇你一跳。其實都唔係咩新鮮嘢或者意想不到嘅事，總有人想更大堆頭更raw，上面段片已經係第三季㗎啦。睇咗幾場，過程都係差不多 :其中一隊一個人好快輸咗，另一隊就有人數優勢，好快兩個人夾手夾腳又搞掂多一個，打打下最後5個人圍埋去打單丁果位可憐人士。

我個人唔覺得有咩好睇，但都可以從幾個方面講下：

畫面上除咗開始果下之外，其實都無特別火爆，亦唔係特別好睇，除非你覺得5個人圍住一個打好好睇。同時，個畫面只可以影住兩個人打，就算影多過一對，你對眼都睇唔曬噤多嘢。

(挑戰人類視覺嘅極限，睇個比賽都訓練你一眼關七。)

公平性上，可以話係零。總之加埋唔過某個磅數就隨便你組合。仲有，最右面Discipline根本唔重要，無一個人睇得出係咩。

（左面果隊平均體重都輕人地10kg，邊有得打呀？）

技術上，個人技巧唔再係最重要。唔會再有試探，唔會再有詳細game plan，一嚟料就搏拳出抱摔。個人技術唔再細膩，但始終唔係一打一，係會有少少團隊合作，例如唔夠打叫人嚟幫手之類。

其實呢到帶出一個重要問題：武術一打多是否可能？好多武術理論上都有呢個能力，而實際上又真係喺youtube見過人地一打多。不過，通常都係一個識嘅打幾個唔識嘅。不過無論你識唔識打，如果對面三個人，一個人咩都唔做就係攬你落地，之後其他兩個人就齋踢你，你都無咩可以做。唔好以為自己學過武術，睇過葉問打十個，自己就可以咁做，所以話最好嘅防身術，一定係和善對人，避免衝突。

差少少唔記得，比埋個2打2有地型嘅比賽大家睇，嗱，小朋友同大人都唔好學呀，好危險㗎（下面段片都有少少暴力，敬請留意）：

（爬繩我捉你落嚟）

（高空捉你落地）

睇唔明規則？好似企係某d位10秒就有分，打打下變2打1，講真，我都唔係好清楚。不過睇呢種比賽嘅人，都唔係想睇規則同技術㗎啦，邊個輸邊個贏其實無所謂。想睇技術，睇返UFC吧啦。

【編按：相片為TFC - Team Fighting Championship及Arena Combat的facebook和youtube擷圖。】

（本文純屬作者意見。）