咩係握手術呢？其實就係泛指所有握手果時攻擊人嘅招式。By the way，呢個名係我作嘅。

大家幻想下，有個人在公司說你壞話，雖然毫無證據不過還是鎖定他，寧枉無縱嘛。陰差陽錯，公司週年酒會居然見到佢，順氣已經唔順，喺你想另轉面走嘅時候，佢見到你之餘，仲行過嚟想同你握手！正所謂「仇人見面，分外眼紅」，你又唔好意思縮手喎，唯手伸出隻手想握一握就算。一路伸你一路唔忿氣 ，一路喺到諗點樣整鬼佢......

究竟有咩武術可以噤陰濕，唔聲唔聲攻擊一個毫無防備嘅人呢？

喺呢到同大家介紹：握手術！

握手術奧妙之處就係喺人地並未有任何戒心，連敵意都未有，好有禮貌咁同你握手嘅時候，痛擊對方，令佢難堪！

先有請師傅示範（https://www.youtube.com/watch?v=qS9k_KekJJM）：

1.先用友善笑容等對方放下戒心

2.握手

3.即時運勁

4.問你怕未？

睇唔明？我都唔係好明。呢位師傅太勁抽，太玄妙，我睇唔透。都係同大家睇睇凡夫俗子嘢先（https://www.youtube.com/watch?v=4tLiHnoNyp8）：

1.同樣先用招牌式笑容引人握手先

2.順時針自轉

3.左手由上而下纏住人地隻手

4.繼續轉

5.做返個4字鎖（figure 4），問你怕未？

係咪覺得好有用呢？如果想再勁D（https://www.youtube.com/watch?v=mE2Y7-NHuOU）：

1.都係握手先

2.向後一踏大力一扯

3.等佢重心不穩

4.用手抓佢下巴

5.一擰

6-7.抬起右腳，踩佢膝頭後面

8.用肘打佢條頸

好喇，呢到開始要認真講。第一，以上嘅動作都有一定危險性，大人同小朋友都唔好試。

仲有，我唔明白點解要練埋D噤鬼陰濕嘅嘢，握個手啫唔洗咁掛？浪費時間同精力去諗點傷害一個想同你握手嘅人，呢種人唔應該學武，而係應該好好學習點搞好人際關係，仲有諗下點消除對世界嘅敵意。

最後果段片，其實本來係想教人如果對方好大力握手想傷你，你點反擊。首先，我唔知係咪文化背景唔同，我未試過同人握手要鬥力；第二，如果你識個人握手都要傷害你，佢唔慌係好人，以後可以唔洗見；第三，同人握手嘅場合通常有其他人，你嗌痛，佢無面多過你無面；第四，如果你住果頭人人都係咁握手，我建議你要好好考慮下洗唔洗搬屋，同埋要話比其他人聽，等大家唔洗同果班野蠻人住得噤近；

第五，呢個要抽出嚟講，呢種所謂「防身術」根本不設實際。要睇一個武術招式實唔實際，就睇佢展示比你睇果時有幾多下「無回應嘅攻擊」。你上youtube可以搵到好多教授拳法或招式應用方法嘅片，如果展示比你睇果時，攻擊者出咗一拳之後就定哂格比師傅反擊十幾下，亦即「無回應嘅攻擊」有十幾下，果段片嘅參考價值唔洗諗都知係零。個男人比人拉低咗之後就咩反應都無，講真，佢咩反應都無，你任打佢都得啦洗鬼招咩？

今日係噤多！下次講下認真嘢！

【編按：相片為youtube擷圖。】

（本文純屬作者意見。）