以下又是一段令人咬牙切齒、悲憤燒心的變態新聞，心血少的人，請慎入。

上星期五凌晨，一男子喺大埔一間單車舖後門，捉咗一隻眼仔碌碌嘅啡白色街貓。佢搵嚟一條幼繩，箍實貓頸，然後大力一拋，頸纏幼繩的貓咪好似林村寶牒咁，被掟上簷篷，再順繩一扯，成隻貓拉返落嚟。未玩夠，再掟過。如是者，一直被繩箍的貓咪慘被虐待兩個鐘，全程被單車舖安裝閉路電視影低。第二朝，單車舖負責人check CCTV時，驚見虐貓惡行，急 call 愛護動物協會求助，再經後者報警，疑兇喺尋日落網。

今次當然唔係第一次有虐貓虐狗虐待動物慘事，相反，在這號稱非常文明、先進國際大都會的香港，久不久就會有此類變態新聞出現。口角滴血的貓貓阿 miu 被人當波踢死的慘案，唔係仲記憶猶新咩？今年年頭，先有另一男子涉嫌喺公司起腳踢飛唐狗 BB 被捕。

影低片段的單車舖負責人話，被虐的貓仔原本同媽媽及妹妹，一家三口住喺自己舖頭附近，仲話自己睇住兩兄妹出世、長大，人貓共融一直相安無事。直至個幾月前，負責人開始發現舖頭附近出現針對貓咪嘅陷阱，冇耐，貓媽媽率先失蹤咗，剩低兩貓兄妹生活。被人當寶牒拋上拋落兩個鐘之後，幼繩斷左，貓哥哥成功逃脫，卻下落不明，一昔日一家三口的貓竇，剩低黑貓妹妹獨守。

香港有法例保障動物權益，任何人虐待動物，一經定罪最高可罰款 20 萬元及監禁 3 年。不過睇嚟法例並不足夠防止不軌之徒虐待動物。政府幾時會檢討保障動物權益嘅政策，到底有冇做到立法原意呢？

延伸行動： 其實今日係「國際抱貓日」，呼籲主人花多啲時間照顧貓貓，畀寵物一個愛的抱抱；就算你冇養貓，都可以趁呢個日子許個願，祈求香港社會人人有人性，虐待事件（不論是人是貓）不再發生。