Facebook 上面有好多呃 like 嘅專頁，成日 post 一啲難分真假嘅相，有時真係唔夠膽亂 like。但係「要求遣返難民大聯盟」呢個 page 就唔同喇，召集人係自由黨李梓敬，大大個嘜頭做 cover photo，一睇就知信心保證，即使係抽水 post，可信程度必定加分。

之但係，有冇諗過點解關心「遣反難民」，會變成關心支聯會的「愛國民主大遊行」呢？關鍵在一張相。話說「大聯盟」前日上載一張相，指摘支聯會聘用南亞外援，嚟支持平反六四遊行，於是留言抱不平：

做乜要搵南亞外緩？你唔好同我講呢個和平友好樂善好施品格高尚的神聖大南亞帝國亞紳士淑女知到自己做緊乜？？

Erm……咪住先！呢名「南亞裔」咁熟口面嘅？係皮膚黑啲，鬍鬚密啲，但佢咪係學聯老鬼、兼現任教協總幹事嘅馮家強是也？！龍之傳人，祖宗點可以錯認？馮家強立馬 cap 圖出 post，表明「我係香港人。我係香港人。我係香港人。‪#‎很重要所以講三次‬」。無法了，未做足功課，抽水抽着火水，烏龍「大聯盟」惹來網民恥笑。

抽水追求「快、狠、準」，今次大聯盟夠快夠狠，唯準繩不足。以貌取人，一口咬定馮家強係南亞人已經唔啱。仲要再假設南亞人唔係香港人，更應該打PAT PAT。自百幾年前開埠到而家，已經有好多南亞裔喺香港落地生根，且為香港貢獻良多。睇《G-1格鬥會》，都會見到印度裔主持人阿 V（Vivek Mahbubani），一口流利廣東話。學馮家強話齋，南亞裔都可以係香港人！

李梓敬身為「大聯盟」召集人，可能喺病房做到一頭煙，回覆《明報》查詢時，話專頁唔係佢負責，對抽錯水事件唔知情，仲話平時已經覺得專頁部分發言略為過火，打算退出唔做管理員喎。

延伸行動： 香港地出名「華洋雜處」，其實好多南亞裔香港人做咗好多嘢，好值得大家欣賞。與其以貌取人，不如踏前一步，大家做個好朋友？