睇咗咁多場歐國盃賽事，最驚喜一定係意大利；依隊係近十年嚟最冇星味嘅意大利，但喺干地調教下，又出奇地打得十分有紀律性同睇頭。

平民意大利　前鋒安排成關鍵

睇返人選，陣中最星嘅一定係保方。然後呢？相信除咗迪羅斯外，都冇咩邊個可以稱得上係星。而且佢哋大部分所效力嘅並唔係咩嘢大球會。

就以上場入 1 球、宣布西班牙衛冕失敗嘅射手柏利，近幾年所效力嘅都絕對唔係一線球隊，分別係英超嘅修咸頓，荷甲嘅飛燕諾，或者係再之前意甲嘅帕爾馬。但點解干地仍然會選佢？好簡單，因為佢可以作為第一點嘅攻擊目標。

喺對西班牙嘅賽事中，好明顯佢嘅頭鎚二傳發揮好大作用，作為第一個攻擊點，絕對係十分有效。但當面隊德國擅頂高空波嘅後防，干地仲會唔會用佢呢？定係針對性地，用返幾位靈活但相對地細粒嘅前鋒呢？不過幾位細粒前鋒如恩莫比尼、打翼鋒嘅恩斯治尼同艾沙拉維，入球率都並唔理想，所以干地點樣出前鋒將會成為關鍵。

相反，德國嘅後衛排陣，我相信又唔會太大改動，因為德國機動式嘅踢法，其實換邊個落去都分別唔大，但一對中堅曉姆斯同保定能唔能夠跟得到意大利前風嘅速度，喺上半場，我唔多擔心，但下半場體力下降後可能就會出現問題。

德國中場具絕對優勢　意大利後防穩陣

中場方面，迪羅斯同柏洛路一前一後嘅防中配搭，破壞力絕對唔係問題，但可唔可以守得住奧斯爾、達斯拿、梅拿等人嘅快速傳球組織，我就有少少擔心。上仗德國對斯洛伐克，睇到佢整個中場線嘅組織絲絲入扣，快速而有效。基亞卓尼利同費奧倫斯都屬於攻強守弱，所以，中場，我相信德國將會有壓到性嘅優勢。

後衛方面，我反而覺得要守住德國嘅高美斯、梅拿或者係普多斯基，意大利嘅後防都游刃有餘。兩閘嘅達美安、迪施基利奧，相信可以有效地守好自己嘅閘位；而中堅基亞連尼、奧邦拿，甚至係巴沙利都應該問題不大。

所以，係咪無得打？又唔係，但德國絕對係有優勢，亦有隱憂。如果上半場意大利用柏利，下半場換前鋒打快速反擊，我覺得意大利絕對有機會再晉一級！

（本文純屬作者意見，不代表香港01立場。）