【武術01】睇拳識女仔之五個唔好講

有無諗過如果遇到個鍾意MMA嘅女仔，好啱feel，好想同佢傾下計
但自己又唔係好識打拳嘢，好驚開口夾著脷，苦惱自己究竟應該點做先好
唔洗愁喎，大師兄教你幾招

有次講起打拳，我有個師叔語重心長同我講：「打拳果時只要你不斷打中人又避免比人打中，就一定贏硬，好簡單」

我果時心諗呢句嘢真係癈話，咁咪即係同「識女仔呢樣嘢呢，只要你不斷做啱嘢又避免做錯嘢就實得。當然靚仔都好重要。」一樣癈。但細心一諗，先發現原來佢想我好好諗下點樣去攻擊同點樣去躲避，果真至理明言。

返到正題，我見住好多朋友仔追小師妹果時都犯下無可挽回嘅錯，決定分享下咩叫啱嘢咩叫錯嘢比大家知。因為可以做啱嘅嘢實在太多，嘅然如此，今次就先同大家分享一下五樣「一講即死」嘅錯嘢，等大家可以避免一下。

一、唔好話自己「玩UFC」

MMA嘅盛行令各大健身GYM近呢幾年都跟風開咗好多MMA班。你可能參加過，我無去呢種班唔知佢地教成點，但呢個唔係問題。問題係同時你又睇過有個MMA比賽叫UFC，咁順理成章，你就同人講：我玩UFC㗎。

你衰咗啦朋友。

UFC只係MMA入面一個比賽組織，而呢個世界有好多MMA比賽組織，亞洲有一堆，歐洲都有好多堆。話自己「玩UFC」就好似你落街場打籃球果時，你同呀媽講「媽我落樓下打NBA呀」咁，好尷尬㗎大佬。

二、唔好搞錯柔道、巴西柔術同巴西戰舞

呢三種武術個名都有少少似，但其實要分都唔難。歷史嘢同細分別唔講，只講大分別。柔道(Judo)著袍，企喺到摔來摔去，少地戰；巴西柔術(Brazilian Jiu Jitsu)有分有著袍無袍，摔落地之後會碌好耐地沙；巴西戰舞(Capoeira)，即卡波耶拉，係班人圍圈圈跳舞咁，轉轉下踢來踢去。

（圖左為柔道、圖右為巴西柔術）

（巴西戰舞-卡波耶拉）

不過我遇過最大獲果次係人地搞錯咗柔術同游水，唉，我果下唔知點答佢，唯有話自己游開自由式。

三、唔好問空手道好打D定泰拳好打D
加下MMA拳手個個都咩都識，技術唔會再單一，好多拳手都混合幾種門派嘅招式。空手出身嘅有人好好打，泰拳出身嘅亦有人好好打，而果種空手道打泰拳呀，拳擊打柔道加下無晒㗎啦，唔好再提啦，感覺仲old school過叫人fax嘢去你公司，想睇一個門派打另一門派就去睇戲吧啦。

四、唔好無啦啦提李小龍

我知李小龍大家都識，我知李小龍對MMA好重要，但唔好下下都攞佢出嚟比，喂你喺電視睇拳見親邊個都問同李小龍比邊個好打D，點答你呀？玩咩？

五、唔好話「MMA？係咪即係G-1咁呀？」

我知好多人都係因為G-1知道MMA係咩嘢，但係正如我所講，班人女仔唔係專業，同其他專業比賽相比水平差好遠。就好似上面講，MMA有好多比賽，G-1只係其中一個，而唔同比賽，雖然大家都叫MMA，規則都會有差異。你睇到嘅，9成都係UFC或者One FC，唔知嘅咪問下囉，你都係想同人傾計之嘛。

其實就唔一定係識女仔，識男仔都得嘅。只係題目太長會睇死人嘛。

今日係噤多，下次見。

【編按：所有圖片來源為Getty Image】

（本文純屬作者意見，不代表香港01立場。）