有個似灰姑娘的窮家女，去了做一個似王子般有錢的靚仔的私人助理。跟童話故事只有一項不同：個靚仔頸部以下是無法郁動的…這其實就是《吸血新世紀》或《來自星星的你》的變奏，男主角是萬能的，只得一項缺點。今次，唔係唔係人，只係唔係行得走得的人。

《遇見你之前》（Me Before You）的賣點，據說是改編Jojo Moyes的愛情小說。Nicholas Sparks（即《忘了、忘不了》（The Notebook）作家）的作品都不夠用了。對於我這類頭半秃、腰圍三十八的中坑來說，這類愛情小說是逆賣點。我入場，一心只是為了看《權力遊戲》（Games of Thrones）的龍女 Emilia Clarke。

平凡少女仰望萬能男主角　中坑代入不能

完全是充滿偏見，寫得出就唔怕認。無論本小說，抑或套電影，目標觀眾都不是我，我硬要去睇，還要寫出來，其實是我賤格。

我惟有把自己設定成一個懷春少女。好了，電影立即好看得多。

故事很簡單，有個似灰姑娘的窮家女，去了做一個似王子般有錢的靚仔的私人助理。跟童話故事只有一項不同：個靚仔頸部以下是無法郁動的。順理成章地，私人助理氹得靚仔好開心，產生一種不知怎樣界定的感情關係，如果將愛情的定義拉得闊一點，就是愛情吧。

這其實就是《吸血新世紀》（Twilight）或《來自星星的你》的變奏，男主角是萬能的，只得一項缺點。今次，唔係唔係人，只係唔係行得走得的人。平凡少女仰望一個又有才華又細心又有品味又知識廣博仲只係喜歡自己的神人。我是少女，我日日逼地鐵再轉小巴返一份悶到爆的工，我都會將夢想投射在這類電影或電視劇身上，明白喎。

頂，我是中坑，已經無發綺夢好耐，連發達的夢都唔敢再發，只能夠發惡夢。真係代入唔到。So sorry。

貼地不迴避　營造更童話的童話

不過，電影中，有一個環節，我是很欣賞的。首先，男主角好有錢，好靚仔，但癱咗，真係非常非常慘情。因為，有得睇無得使。電影沒有迴避這個敏感而不討好的細節，講明搞唔到嘢是令男主角生不如死的主因。

不討好？是不是老人家才以為性愛對懷春少女來說是不討好？一般現代少女，第一時間去驗貨，看看足不足夠長相廝守啦？這本小說，這套電影，相當貼地。貼地到一個地步是不怕講完又講地話你知錢真係好有用，什麼問題都可以用錢解決，玩潛水要錢，坐頭等要錢，這是比改編白雪公主或睡公主做武俠電影更童話的童話。

【編按：劇照來源為電影網站。】

（本文純屬作者意見，不代表香港01立場。）