不經不覺，1984年版本的《捉鬼敢死隊》（Ghostbusters），已經是超過30年前的事，一家大細齊齊睇明珠930的日子已一去不回。再翻拍，舊有粉絲一定炮轟主角換上全女班的設定，我不是粉絲，我只是比較了解人際網絡在職場的重要性。

交由 Paul Feig 執導，他有本事把《醉爆伴郎團》（Hangover）改頭換面成女版的《最爆伴娘團》（Bridesmaids）而同樣獲得成功，手執 Melissa McCarthy 這名愛將，長情又好，迷信又好，懶惰都好，繼續用落去，也合情合理。跟什麼女性主義抬頭與否，我看不出有什麼關係。有朝一日，如果翻拍《第一滴血》（First Blood），荷里活夠膽死搵個大隻妹單挑伊斯蘭國，我才相信電影圈跟世界政治圈跟你屋企一樣，都由女性話事。

又不算不照顧舊粉絲的感受。除了例牌地請回 Bill Murray 及 Sigourney Weaver 等舊班底客串一角外，更刻意提到多齣七、八、九十年代經典電影如《閃靈》（The Shining）、大白鯊（Jaws）、《人鬼情未了》（Ghost），你看得明，識笑，證明你有一定年紀，九十後的觀眾，大概見到 Melissa McCarthy 個頭180度自轉，也不會聯想到《驅魔人》（The Exorcist）。

咁咪好囉，可以將鬼口水當新奇事般看待。拍攝技術進步了，在3D效果下，鬼口水向前直噴，你幾乎會立即想取出紙巾，跟昔日在玩具反斗城購入的泥膠質感，已經是完全兩回事。

至於，究竟套戲好唔好睇？我會說，幾好笑囉。

最大驚喜不在幾位女角身上，反而是負責扮演花瓶的 Chris Hemsworth，因為後生，因為靚仔，因為大隻，因為未試過，做一個被抽水的搞笑傻仔的效果，比《凸務Madam》的 Jude Law 加 Jason Statham 更稱職。尤其放在片尾當彩蛋功能的跳舞片段，我覺得比他扮雷神擺出一副 chok 樣更吸引。但你可以想像如果由他帶另一班靚仔或醜男做主導，效果又會截然不同。都是關乎定位與夾唔夾，無得勉強無得一廂情願。

（本文純屬作者意見，不代表香港01立場。）