【奧運足球】巴西有尼馬就一定掂？未必…

今屆奧運足球，如果要大家揀一隊大熱門，相信非巴西莫屬！大家可能未必知足球王國巴西原來從來未贏過奧運金牌，最勁都係上次亞軍！今次喺自己地頭更加唔衰得，仲寧願唔帶王牌尼馬踢美洲盃都要佢踢奧運威威，咁睇牌面級數，巴西仲唔係十拿九穩？非也！上次世界盃巴西夠大熱門喇……

  1. 名大於實：

洛迪高想講嘅第一個原因，就係巴西陣中唔少球員都名大於實。就好似前鋒嘅加比爾巴保沙（Gabriel Barbosa）喺國內花名Gabigol，不過喺美洲盃就無咩表現，未知係龍係鳳。其中好多國內「球星」，好似門將烏列臣（Uilson）、加比爾捷西斯（Gabriel Jesus）（已轉投曼城）等，名就叫做新星，Youtube睇都好好波，不過有啲嘢落到場先知。

  2. 超齡球員咁樣揀：

奧運足球規定，參賽名單入面最多只能夠有3位超過23歲嘅球員，即係「超齡」球員。巴西揀咗咩人？其中一位係皇牌尼馬（Neymar），另外兩位分別係效力柏拉尼恩斯嘅門將韋華頓（Weverton），同埋美洲盃中畀人彈、效力緊中超北京國安嘅中場連拿度奧古斯圖（Renato Augusto）。從實力嚟講，巴西嘅超齡球員，真係得尼馬打得下…

  3. 壓力巨大：

作為東道主，加有尼馬壓陣，拎唔到冠軍就係失敗！應付咁嘅壓力，連上次喺本土踢世界盃嘅成人隊都被拖垮，喺四強大敗畀德國，咁班後生仔又會點呢？

  4. 對手都唔弱：

雖然話巴西有今屆奧運最大名氣球星尼馬撐場，不過都話足球唔係1個人踢，都要睇隊友同整體！上屆巴西都大熱門，不過決賽都係輸畀整體戰入手嘅墨西哥！咁究竟今屆比賽入面，有邊隊可以做攔路虎呢？

A. 墨西哥

上屆冠軍，雖然大部份球員都係來自本土聯賽（僅得前鋒艾歷克托利斯（Erick Torres）效力美職聯），不過踢整體足球嘅佢哋，表現實而不華，喺無咩壓力下可望再爆冷！

B. 德國

德國隊有唔少球員已經喺德甲踢過唔少比賽 ，有啲仲踢過國家隊添，其中仲包括超齡球員嘅賓達兄弟：拿斯賓達（Lars Bender）及施雲賓達（Sven Bender）。

C. 阿根廷

雖然首戰輸波，不過作為巴西宿敵，當然唔可以畀巴西威晒！其中焦點會係門將魯利（Gerónimo Rulli）、馬體會前鋒安祖哥利拿（Ángel Correa）同埋馬體會主帥施蒙尼（Diego Simeone）囝囝G. 施蒙尼（Giovanni Simeone）。

D. 尼日利亞

1996年阿特蘭大奧運冠軍，2008年北京奧運銀牌得主尼日利亞都唔可以忽視，同埋喺U隊層面，非洲球隊通常都表現唔錯。

首戰過後，巴西隊以0：0失望戰和南非。當然實力非凡嘅佢都叫做大熱門，不過洛迪高認為，巴西隊最大嘅敵人係自己。

文：洛迪高＠世界波

（本文純屬作者意見，不代表香港01立場。）