農曆七月又到，本來我不是太想寫鬼古，因為我極度怕鬼、極度怕黑，由細到大，晚上都要開燈睡覺，一世人未睇過鬼片，少少風吹草動都會嘩鬼咁叫。不過，入得影視行業，就要知道什麼叫「百無禁忌」。講到明娛樂圈，偏門行業，最招惹靈體，而且據聞鬼鍾意睇戲，有機會就會來湊熱鬧。何況電視城有古裝街又有民初街（其實還有一條叫瘟疫街），道具倉又放滿墓碑、神主牌，完全符合靈體精神需要。雖然電視城由清水灣的深山搬去將軍澳堆填區，猛力已經大減，但點知幾時輪到自己中招？

一、骨灰龕場不滅血潰事件

租借外面的骨灰龕場拍攝很麻煩，製作部通常都選擇在錄影廠內搭景。觀眾在電視劇上看到拜阿媽、拜車禍而死的女朋友之類的場景，十居其九都是用佈景道具搭出來的。前兩年，有套劇要連續幾日拍拜祭畫面，按劇本搭了個骨灰龕場，佈景設計師還加了張小木枱在骨灰龕位前，上面放些花和祭品方便做戲。

話說設計師每天都要去錄影廠「收景」，確保當天的廠景沒有問題。拍攝骨灰龕場的第 1 日，設計師去收景，發現小木枱旁有幾滴深紅色的污漬，驟眼看似乾了的血。設計師不以為然，隨便拿塊布抹走了事。點知第 2 日，在同一個位置，又出現一模一樣的深紅血漬。

設計師覺得奇怪，明明同一班佈景手足仔細查過，小木枱既沒有滲漏問題，附近亦沒有紅色液體。到拍攝第 3 日，血色漬竟然在同一位置再出現！設計師覺得唔對路，立即 call 來工程師檢查天花板。兩個工程部手足爬上天花板前還嘻笑怒罵，話設計師一定撞鬼啦，邊有咁奇怪的事。誰知他們兩個人一爬下來，面無血色，木無表情，不發一言就走了……後來問他們見到什麼，死都唔肯講。

二、車頭相後有喊聲事件

死人拜神之類場景經常「舐嘢」，有咁上下年資的手足都一定知。有次錄影廠搭了個靈堂拍出殯，快要 roll 機開始拍時，有個新來的FM（註：Floor Manager，導演與演員之間的溝通橋樑，FM 在耳機接收導演在 Panel 房的指示，負責傳達給演員知）

　突然叫停，按住耳機，大聲問：

「喂！拍緊嘢！邊個喺度喊？」

　個個你眼望我眼，哪有人喊？FM 哥哥一邊問，一邊走向幅車頭相後，喃喃自語：

「仲要匿埋張相後面喊……」

一繞到後面，竟然冇人！當再 roll 機，喊聲再次傳出，又再次無人發現，FM 終於醒覺，原來只有他的耳機聽到。聽聞他沒多久後就辭職不幹了。

三、古裝櫃裝了個古裝「人」事件

電視城有幾個景料貨倉，最大的一個在 2 樓 canteen 旁。雖然有開燈又有冷氣，但裏面暗暗黃黃，又散發着一股微微發霉的木味，感覺陰森。有天，有個由大陸訂的民初拉環大木櫃運到貨倉，3 個同事落倉視察。一見到個櫃，女同事呆了不作聲，之後話見暈拉走另外兩位同事。

聽說事情是這樣的：3 個人一行近個櫃，都已經覺得渾身不對勁。

　後來討論，同事 A 話：「我見到一個背着我哋嘅黑色木櫃，櫃門面壁，陰氣好重」；

　同事 B 就話：「吓？我見到嘅，係一個面向我哋嘅黑色木櫃，櫃門係玻璃造，裏面空無一物」；

　話見暈的女同事 C 有陰陽眼，時不時都撞嘢：「我同同事 B 一樣，見到一個面向我哋嘅黑色木櫃；但不同嘅係，玻璃櫃門後，我見到一條燒焦黑色、無臉嘅身體，倦曲屈膝坐喺櫃裏面……」

好啦！公道講句，其實電視城 24 小時都有人，深夜更加是開廠時間，人來人往，非常熱鬧，中招都應該有人陪。以前經常有人話見到大頭鬼，有人就質疑過，其實大家是不是認錯了阮兆祥。

電視台多下面來的鬼，更多上面來的「鬼」，我講緊咩，心照啦！

（本文純屬作者意見，不代表香港01立場。）