香港MMA比賽點可以唔入場支持下最後一場仲要老闆自己御駕親征

IMPI World Series Asia 4上個星期六喺灣仔修頓舉行，作為香港本土MMA比賽，梗係要入場支持啦。

我買張票都幾前所以都睇得幾清，當然就一定睇唔晒所有角度同細緻位，不過唔怕，因為現場有大螢幕現場直播，近我果面嘅時候我睇個籠，落地、太遠睇唔清就睇螢幕。講真，睇拳同睇波一樣，喺屋企睇同現場睇感覺唔同。睇波睇拳坐喺屋企睇，有人講解之餘角度又清，咁點解要比錢睇現場？其實都係想睇氣氛之嘛。拳手出場就成場一齊叫，拳手比人打中就一齊緊張，贏咗一齊歡呼，真係好過癮。

而且有好多香港拳手，或者者喺香港教拳嘅拳手參加，親眼支持感覺係唔同D。有幾間拳館特別多人嚟睇，聽佢地拳手出場果時有幾多人一齊叫就知。

睇香港比賽總有D彩蛋，例如出場音樂用《Sandstorm》 （著名拳手Wanderlei Silva出場曲，不過我可能聽錯）、《You can't stop me 》（《特警新人類》主題曲，呢個我無理由聽錯......掛）。

講返正題，其實有好多好賽事可以講，但因為未有其他比賽片段，所以講唔到咩野。不過當日最後一場壓軸比賽，官方有upload上網，可以去佢地個FB睇（IMPI World Series）。有片可以同大家講兩句。

御駕親征

呢場壓軸係由Vuyisile Colossa （左）對 Marcelo Tenorio（右），真係話題性十足。第一，呢場係Openweight比賽， Marcelo Tenorio重Vuyisile Colossa差不多10KG；第二，Vuyisile Colossa 係IMPI老闆，即係佢不單止搞個比賽，仲要自己落場。拳賽老闆係拳手或前拳手唔少見，但係搞場比賽自己仲要打真係少有，加上好似話係得3日通知就上場，認真藝高人膽大。

講返場比賽，Vuyisile Colossa除咗較輕，仲要矮對手成個頭。因為手距問題，加上對手高過自己成個頭，要直接攻擊對手個頭好難。面對Marcelo Tenorio的壓迫，Vuyisile Colossa多數都係靠步法左右遊走，等機會突進用前手刺拳後手直拳打對方身體，同用inside leg kick打對方大腿內側，甚少直接出拳打頭。

打身體同大腿內側有幾個好處。第一，雖然呢種攻擊好少一下KO對手，但傷害會accumulate ，影響對手嘅體能，亦可攞分；第二，呢種攻擊除咗可以切斷對手嘅combination，亦可以阻止對方過份的壓迫；第三，我覺得其中一個最重要嘅效用係，令對手將注意力放係自己的中下段，而唔係上段。

第二合回開始Vuyisile Colossa多返用拳打頭，亦試下打右拳overhand，但都打唔中。去到第三回合，對手體力下降，打多幾次身之後，一個突進overhand終於打中對手。之後喺地面補多幾拳拳證就停比賽，贏果時成場支持者一齊叫，好熱血！

下次比賽係12月，大家記得入場睇呀！

（文章圖片由IMPI World Series提供）

（本文純屬作者意見，不代表香港01立場。）