【武術01】罩門英文係咩？

《城寨英雄》砵仔糕店老闆嘅戰鬥力，應該可以入到《復仇者聯盟》劇集誇少少先好睇嘛我嘅罩門係銀包無錢

見到《城寨英雄》入面砵仔糕店老闆一打四，唔只係打極都唔死，直頭係傷都無傷，皮都無少一塊，刀又插唔死，搵唔到佢個「罩門」就無晒符，完全係個超人類。

當然劇中誇張咗鐵布衫嘅功力，但硬氣功就確實係有嘅，不過究竟係靠「氣」、定靠「精神力」、定靠「呼吸」、定靠「緊繃肌肉」、定係好似極真空手道咁練抗打練返嚟，定係靠晒以上全部，我無學過真係唔知，文末放條片比大家當表演睇下，記住記住記住唔好學呀，睇下好啦。

罩門即係弱點？

因為我唔識鐵布衫所以講唔到咩，不過我一路睇就一路諗，究竟罩門係咩？原本係指練外功，例如鐵布衫，總會有練唔到嘅地方，比人一攻就破，現代通常延伸為「弱點」嘅意思，不論係生理定心理。

人體一向都有練唔到嘅位，例如眼、鼻、後腦、下陰等（我就未見過有人會練面部抗打，可以練勁個鼻唔怕比人打），呢D位練拳時教練都會叫你好好護住，而大家都知道呢D位係人體弱點。

其實罩門同弱點係詞意上有少少差別，罩門通常會較為個人，而弱點通常人人共之，不過聽得明就好。

仲有無其他比較少人知嘅弱點？

開估先，罩門嘅英文係Achilles' heel。Achilles即阿基里斯，希臘第一勇士，即係《木馬屠城》入面呀Brad Pitt呢。Heel，即腳後跟或足踝。

相傳Achilles個媽媽想個仔刀槍不入，所以就日日帶佢去浸條聖河，但佢又要捉住個腳後跟，吊住佢嚟浸，所以佢腳後跟就浸唔到聖水，成身得嗰個位無刀槍不入嘅能力。結果有睇戲都知，Achilles就係腳跟比人用箭射中而死。所以，Achilles' heel一詞就指現代人嘅罩門。

講咁耐其實係想講下一個比較少人知嘅人體弱點，就係人嘅跟腱，係小腿後側嘅肌腱，又叫阿基里斯腱，英文係Achilles tendon。點解提起呢，因為降服技有一招叫Achilles lock，就係用前臂條骨施加壓力喺對方條阿基里斯腱上，令對方因痛楚而投降。

睇返硬氣功

打人嗰位係個拳手，上次容祖兒果篇文介紹過。講明先，以下內容較為暴力，留意呀。

再講多次，千祈唔好學呀，真係睇見都痛。嗚呀，好彩歐瑞偉唔洗咁比人打咋。

（本文純屬作者意見，不代表香港01立場。）