最近去睇《屍殺列車》，好刺激一路睇一路諗，有無幾招可以喺喪屍危機時用得着呢？身邊無武器打，呢幾招話唔定可以救你一命

知己知彼

首先，跑走一定係最好方法。不過我估同打拳一樣，知道對手有咩招好重要。例如，你首先要知道你面對嘅係《Walking Dead》、《Night of the Living Dead》、《生化壽屍》果種步行屍，定係好似電影《World War Z》（小說入面都係步行屍）、《28日後》、《L4D》果種識跑識跳嘅迅猛屍。如果你遇到嘅係步行屍，我估靜靜雞避開之後跑走係最好方法；如果係迅猛屍……你自求多福，走到就走啦。點都好，平時練好少少體能一定無死。

衝緊埋嚟

如果得一隻喪屍行緊埋嚟，又唔係太大隻，你想同佢保持距離，你可以用side kick或者push kick踢開佢。如果你個form係比較側身（bladed stance）就前腳side kick，如果你個form係比較正身（square stance），就用push kick，即係teep。

其實唔只打喪屍，打人嘅時候如果想保持距離，都係用呢兩吓。不過踢人有時會踢頭踢膝頭，踢喪屍都係踢身踢走佢㗎啦，如果佢未甩皮甩骨嘅話。

Back kick就唔好啦，你又要轉身，插唔中又比隻喪屍咬背脊。除非有隻喺你後面嚟，你直接向後踢。

埋到身

如果埋到身，用手推開佢，佢都係繼續嚟，走就一定要走，但究竟點走好呢？如果空間夠大，向左右側閃會係個好方法。呢個情況打拳都會發生。對手可能係一個摔跤手，或者偏好纏鬥嘅選手，佢會好想埋你身，但你可能纏鬥無佢咁好，不過打擊技好過佢，咁你除咗上述可以出腳踢開佢（其實對住摔跤手起腳太高會好易被摔低），就係喺佢衝埋嚟嘅時候向側避。

畀隻嘢捉住咗

咁大鑊，你應該要瓜了。我估隻喪屍都係一味向前衝，呢個時候你識掃腳整跌佢當然好。背負投就唔好啦，會比人咬頸。

我個人覺得巴投應該會幾好用，我估。（次次都講巴投）

跌低咗，點算

喂情況嚴峻到呢個地步我好難救你喎。首先，所有關節技、choke都係無用嘅，因為隻喪屍唔怕痛又唔會窒息，而且你出呢啲招果時，佢仲可能咬到你。

如果佢未趴上你身，你可以用technical stand up，因為你擰轉走仲危險，佢撲埋嚟你都唔知。

如果趴咗上嚟，你可以試下以下動作，睇下得唔得。最緊要快……

大家多練，話唔定救你一命呀！

另外，有網友提我上次段片係日本唔係韓國，我搵唔到確實資料，但我武斷地認為段片講韓語就係韓國人確實唔啱（加上我可能聽錯呢），喺呢到想多謝網友提醒！多謝你哋支持呀！

今次係咁多！

（本文純屬作者意見，不代表香港01立場。）