有得揀嘅話，你會想悶住嚟贏，定輸得「好睇」？對一個拳手而言，又邊樣好D？

首先講下咩係悶住嚟贏同輸得「好睇」先。

有一班摔跤能力高嘅選手，會一開始就將對手摔低，之後做壓制，得閒打對手兩拳，等回合完。下個回合開始，做返同樣嘅事。完場，贏點數。呢種打法叫 Lay and Pray，大多數人用呢個詞都係作貶意用，不過唔好誤會Lay and Pray無技術，當中摔同壓制嘅技術要求好高，不過就悶親人囉。同時，並唔係一落地就係悶嘅，好多寢技大戰都好好睇。

有一種拳手，不論對手係咩人，都係搏拳搏拳搏拳，出到嚟就出拳，自己中拳都唔理，打中打唔中都出拳，總之搏拳、出拳、大力揮拳。呢種搏拳，對好多casual fans嚟講係好刺激嘅，對於成日睇拳嘅人嚟講，一晚比賽有一兩場呢種搏拳都唔錯，但呢種情況技術含量唔高，場場係咁就覺麻麻。

對拳手而言，悶住嚟贏好？

大家可能覺得呢個問題好怪，拳手為錢打拳，梗係羸好過輸啦，仲洗問？就好似踢波泊大巴，死守最後贏一粒，一定好過對攻最後三比四輸俾人吧？

用例子講講。

岡見勇信（Yushin Okami），由2012年8月開始，連贏咗三場比賽，係當時UFC頭十嘅中量級選手，直到2013年9月，只不過係輸咗一場，就俾人release咗，無得繼續喺UFC打比賽。UFC主席被問到點解要炒走佢，佢就答岡見勇信係勁，但好多人上緊嚟，再留佢喺到，佢又做唔到冠軍無咩意思。岡見勇信由2006年開始已經喺UFC打比賽，咁多年嚟有贏有輸，係唔係最勁嘅選手，可能唔係，但戰積比佢差嘅人大有人在，要炒點都唔到佢。網民就講，通常UFC炒人，都係炒嗰班已經連輸3場嘅人，只不過因為岡見勇信係偏向 Lay and Pray嘅選手，大多贏都係贏點數，所以UFC主席覺佢悶就炒咗佢。

呢個唔係單一例子，同年2月，Jon Fitch都係輸咗一場就俾人炒咗，而佢當時嘅戰績係14勝3負，亦係佢量級入面頭十嘅選手。最似嘅地方係，Jon Fitch都係成日俾人話佢悶。

輸得「好睇」呢？

Diego Sanchez同Leonard Garcia都係一出場就想搏拳嘅拳手。Diego Sanchez呢7年都係輸下贏下，雖然成日都攞到「全晚最佳比賽獎」（ Fight of the Night），但就頭15位都入唔到。Leonard Garcia加下已經俾UFC release咗，不過佢嗰時係連輸5場先俾人炒，待遇同岡見勇信及Jon Fitch完全唔同。

「全晚最佳比賽獎」仲會有特殊獎金，所以輸唔一定代表少錢。

所以?

最核心問題係，MMA究竟傾向搏擊運動多，定係娛樂多？如果傾向搏擊運動，就應該更大程度上容許悶得嚟可以贏嘅戰術。同踢波唔同，你贏晒所有對手，你就係冠軍，亦唔會話因為你隊波踢得唔夠好睇就唔俾你踢。但因為加下UFC邊個可以挑戰冠軍，都係UFC官方話晒事，你可以連贏5場，但另一個拳手贏1場靚嘅，就俾佢挑戰冠軍先。喺呢個情況下，打得好睇好似重要D。

不過，觀眾同拳手質素嘅提升，會漸漸令情況得以改善。因為大家要求高咗，就唔會滿足於搏拳就算嘛。

今日係咁多！

（本文純屬作者意見，不代表香港01立場。）