拉瑪九世嘅上手當然係拉瑪八世，係佢阿哥。拉瑪八世20歲就死咗，細佬繼位好合理。但，點死嘅呢？係在王宮入面中槍死嘅。邊個兇手？唔知，唔好問，唔好討論。

先講小故事。

三國時，吳國，有個綠衣奇怪小朋友忽然出現，雙眼着火咁。其他小朋友好驚，怪小朋友就話「唔使驚，我係熒惑星（火星）。我嚟係話比大家知，三國，全部都會歸司馬氏，放長雙眼睇啦」，大人出嚟，怪小朋友已經化成白煙走咗。

重點係，成個故仔係晉朝《搜神記》記載，晉朝之前並冇出現。對，司馬昭之心路人皆見嘅司馬氏晉朝。明啦？故仔九成係事後作出嚟嘅。天文現象「熒惑守心」，指火星停留在「心宿」（天蠍座）。「熒惑守心」代表兵變，君主交替。但，現代考證返，中國史書上好多次「熒惑守心」都係偽造嘅，根本冇發生喎，係為政治服務，合理化奪權。

今次要戴定頭盔。小弟唔識泰文，亦冇乜泰國朋友。而就算有，相信佢哋都冇心情答我問題。以下種種，有可能有錯，亦有係我嘅猜測，若有冒犯，先行賠罪。但亦冇法，因為，儘管香港人成日去泰國，但泰國其實好神秘。

泰國極之特別，係東南亞唯一冇被西方殖民嘅國家，亦係二次大戰少數冇被日本侵略嘅亞洲國家（主要因為畀左日本軍事通行權）。

泰國，一方面係佛國，美食，陽光與海灘，微笑之國，友善嘅人民；但另一方面，亦係滿天神佛，政局不穩，會唔畀黃之鋒入境嘅國家。泰國亦有堪稱世上最嚴嘅欺君罪（Lèse-majesté），嚴格執行，外國人亦冇例外。唔好話非議泰王，連講吓隻狗都可以收監（所以我要戴頭盔）。

泰王，亦係好特別。對泰國人嚟講，泰王係神一樣。侮辱泰王，好多時都未使出欺君罪，人民自然會修理你。最出名嘅泰王，應該係拉瑪四世。邊位？《國王與我》（The King and I）入面嗰位。第二出名嘅，好可能就係剛離世嘅普密蓬，拉瑪九世。

拉瑪九世係傳奇中嘅傳奇，泰國人同外國人都真心愛戴佢。美國麻省出世，英俊，受高等教育。唔止，佢仲等於動畫《小魔星》入面嘅「原子力」，乜都識。靜嘅，玩爵士樂吹色士風仲作曲流傳後世。動嘅，玩帆船代表泰國在東南亞運動會拎金牌，夠勁未？唔止，佢仲識得造雨！有歐洲專利的。名副其實係呼風喚雨嘅rain maker。

傳說一：普密蓬登基之謎

拉瑪九世當然係有樣有才華嘅泰國男神，所有泰國戲院開場前都播佢嘅歌（唔係泰國國歌喎）。但拉瑪九世，更加傳奇，或更加神秘嘅，遠超於此。

拉瑪九世登基，已經夠傳奇，或神秘，或者話……爭議。拉瑪九世嘅上手當然係拉瑪八世，係佢阿哥。拉瑪八世20歲就死咗，細佬繼位好合理。但，點死嘅呢？係在王宮入面中槍死嘅。邊個兇手？唔知，唔好問，唔好討論。

官方解釋係洗槍時走火，但佢大近視，死時冇戴眼鏡。仲有眾多證據反駁走火論，但政府唔畀發表調查結果。三個僕人被處決，但當然人人覺得係替死鬼。泰國人唔敢講，但當然有人覺得係最大受益者，拉瑪九世指使嘅。同時亦有不少證據反駁呢個講法。但重點始終係：成件事係禁忌，唔可以公開講。

傳說二：普密蓬駕崩與「鄭信詛咒」

拉瑪九世登基傳奇，死後更加傳奇。寫呢篇文時未睇到第二日報紙，但相信一定會有人講傳說中嘅「鄭信詛咒」。

鄭信何許人？係泰國對上一個王朝，吞武里（Thon buri）王朝嘅國王，短命王朝13年玩完，就得佢一個。邊個食咗佢嘅王朝？正係拉瑪一世，現今泰國王朝，卻克里（Chakri）王朝嘅第一任泰王。

當時發生咩事？正如泰國其他故事一樣，冇人知，亦冇乜人敢講。但基本上，拉瑪一世同鄭信出生入死，鄭信封佢為義子（所以泰國王朝有中文鄭姓）。應該係拉瑪一世借叛亂，或自己策動叛亂，謀朝篡位，殺埋鄭信。

呢度，先嚟第一個傳說。民間流傳話，鄭信同拉瑪一世年幼時一齊做和尚去化緣，撞到個算命先生。算命先生話：你兩位第時都會做國王。果然鄭信後來成為國王，而拉瑪一世亦都成為國王——看官，咁遠嘅故事好難考證，但我有理由相信，呢個古仔，係後來先有人作出嚟，去「合理化」拉瑪一世上位，係天命所歸。

咁主菜「鄭信詛咒」係乜？就係話，傳說鄭信死前發毒誓：邊個奪我王位嘅，九世而亡。

咦？剛過身嘅泰王，咪就係拉瑪九世咯？當然，正如「一個中國」一樣，「九世」呢樣野，各自表述。有人話「九世」唔係九個皇帝，係九個世代，咁都仲有排玩。亦有人話到時傳位畀個女咪得，唔同姓氏，又再玩過。

「鄭信詛咒」不少人講，甚至講到話曼谷個鄭信騎馬像原本對住皇宮，但拉瑪九世上任後，發現夜晚聽到馬叫聲，覺得鄭信返嚟搵佢呢個末代國王索命，下令掉轉九十度唔好對住佢喎。Well，鄭信隻鬼咁神通廣大，咁多年後都識返黎搵拉瑪後人，但就唔識轉番九十度再馬叫。OK，反正我信了。

有冇諗到，「鄭信詛咒」，最唔合理嘅係乜？就係，你搶我王位，做乜仲要比你做九代？應該半代好即刻死啦。冇證據，但有理由相信，呢個所謂「遠古傳說」，應該係好近代先出現。有資料嘅不妨補充下。

我用wisenews搵返傳媒報導，2006年前，中文傳媒基本上冇人提呢個詛咒。同樣地，即使我用Google，亦發現，呢個詛咒，好似係2006年之後先廣為人知。唔使試了，我用過英文搵Chakri nine generations，結論一樣。

點解係2006？泰國史測驗時間：記唔記得嗰年發生咩事？冇錯，就係泰國政變，前總理他信（Thaksin）落台。

係啦，當時仲有個講法，話他信就係鄭信大帝轉世（唔好笑，是真的），由佢嚟終結拉瑪王朝，實踐「九世而亡」嘅宿命。唔只兩位都有個信字，事實鄭信同他信，英文拼音都係Thaksin。兩位都係祖藉潮州，同中國甚有淵源。有冇睇過《搜神記》，就真係唔知了。

（本文純屬作者意見，不代表香港01立場。）