胡國興記招金句實錄:無包二奶唔怕黑材料(有片)
年屆70的退休法官胡國興,今日(27日)下午「單拖」上陣,搶閘宣布選特首。為人風趣幽默的他,對記者有問必答,更當場大派金句,笑言自己沒有「包二奶」,所以不怕「黑材料」;被問及健康狀況時,他指自己中氣十足,更反問記者稱,「你係咪覺得我身體差?」
談及近日的宣誓風波、港獨爭議、三權分立及《基本法》第23條立法時,他不諱言稱,香港有責任要就23條立法,更著「大家唔使驚」,又指如果有人採取手段引入《國安法》,「到時你仲慘,仲難頂。」
胡官金句:中央篇
問:曾否就參選特首接觸中央?
答:我無接觸過中央,唔知有咩路數,不如你教我?
問:中央對你參選特首有何回應?
答:中央無回應,無回應就係唯一嘅回應。
胡官金句:個人篇
問:會否擔心被揭黑材料?
答:完全唔擔心,我都無黑材料,希望佢搵到啲出嚟,我又無「二奶」,睇下我到時點解決。
問:是否認為自己比其他疑似特首參選人優勝?
答:我都諗唔到,究竟有邊個好過我?邊個好似我咁中肯、咁講道理?
問:年屆70的你,身體能否應付繁重工作?
答:我見大家咁耐,講咁多嘢,仲係咁大聲,你話身體係咪差呢?
問:你是否已經戒煙?
答:我戒咗4年,但仲覺得煙好好食,所以我仲係驚(會食返煙)。
胡官金句:梁振英篇
問:評論梁振英?
答:佢唔揭我瘡疤,我都唔揭人瘡疤。
問:梁振英治下的香港有甚麼問題令你不滿?
答:有咁多,我唔記得,我就講「橫洲」,點解一開始係財爺負責,幾日後又佢又話係自己負責......呢啲要交代囉,香港人唔係蠢。
胡官金句:宣誓、23條、港獨、三權分立篇
問:如果你是特首,你會如何處理立法會宣誓風波?
答:我睇唔到特首點解要做原告人,我唔係話你行政干預立法,但你唔好令人覺得你干預,咁樣唔好睇。
問:是否支持《基本法》第23條立法?
答:香港係有責任要就23條立法,其實大家唔使驚,如果有人採取手段引入《國安法》,到時你仲慘,仲難頂。
問:如何評論港獨?
答:港獨違憲,我都唔明支持港獨嘅人點諗,所以我好想見佢哋,等佢哋解釋我聽,我好願意聽人意見,歡迎佢地俾我去見佢哋。
問:香港是否有三權分立?
答:司法最大權,有咩解決唔到,司法去解決,無人可以制衡司法機構。