本欄目逢每月1、11及21號出刊。

北漂、港漂，相信在中港融合大勢下，這類詞彙大家都耳熟能詳。在香港的各位，未必個個有內地生活經驗，但相信你身邊總會有一些廣東話唔鹹唔淡的同學、同事，就算你話無，都肯定或多或少見個一類廣東話唔鹹唔淡，在羅湖一箱箱運水貨搭火車的水貨客，甚至係屋村有班美艷少婦，著熱褲低胸衫，一邊玩手機打Wechat一邊用內地方言交談，係度等仔放學。無錯，呢班就係我地一般印象中的「港漂」

根據百度百科，「漂」是指內地其他地方人來到某大城市讀書生活，例如去北京的「北漂」，來香港的「港漂」，在北京的北漂未必有戶籍，在港的港漂有身份證，但又未做到香港永久居民。佢地離鄉別井讀書生活，可能憂柴憂米，又可能住洋樓養蕃狗，生活好過你同我。

朋友，「漂」呢群人唔係呢近年的事。有人話八十年代，大陸改革開放，貨車佬、地盤佬，一個個返大陸發展，一個個係飲茶泵骨個陣，順手識到內地美媚，娶佢地黎香港，呢批係第一批「港漂」。其實「漂」呢類人係中國已經好耐，起碼成千年歷史。記得中學老師教中文時講過，中國第一個「北漂」係杜甫，唐朝科舉因為有試外評核(即類似依家中學SBA，計平時分)，所以河南人杜甫，要千里迢迢留係長安生活十年，爭取首都當地名流的支持，希望考個一官半職，個種辛酸生活同悽慘，令到杜甫體驗左好多基層生活，令到佢寫左好多好鬼慘的詩，依家要我地背。

雞全部都係雞?

上面提到廿幾年前嫁黎香港的內地女人，當時呢批人無乜學識，透過「姿色」改變命運，但卻被當年香港人帶住有色眼鏡歧視！話佢地北姑、雞，呃香港人(記得當年前立法局議員詹培忠仲話過「十個女人十個係雞，只係公雞同私雞的分別。」)！但正如德國劇壇大師布萊希特話過：「打劫銀行怎能與開銀行相比？」喂！佢地靠自己努力生活，有唔少少婦嫁俾大幾十歲的老人家，幫佢地開枝散葉，繼後香燈，照顧晚年起居飲食，好多野你情我願！

無錯，頭先上面所講，係其中一種在港的「港漂」，或幾十年來對「港漂」的睇法。但我敢講，呢班只係港漂中極少極少一部分，甚至係唔正確的印象。現在大家受媒體渲染，對內地人的認識未必準確。點解我話我「敢講」？雖然我係一個土生土長香港仔，但我有多年係北京生活經驗，亦唔知係咪個天玩我，我係北京同香港，溝親都係北漂、港漂。我認識的漂族，同上面個班美艷少婦，水貨客的形象完全唔同。

係喎，仲未介紹我自己。我叫賈耀武，祖籍湖北。祖藉湖北的香港人並唔多，出名的演藝員亦只有徐小鳳和翁虹，我雖然係香港出世，但一個舉家為湖北人的香港經驗，遲下會同你地分享。

我係香港讀小學中學，大學起就去左北京讀書，畢業後就中港兩邊走，就黎到不惑之年(即係四張野)。細過老師話二千年前有個思想家叫孔子，佢話男人「三十而立，四十不惑」，細過唔知佢講乜，心諗：不惑？唔再古惑？但係，當我就黎到呢個年紀，經歷咁多風風雨雨，經過呢十幾年黎同我身邊各個情深緣淺的女友們種種遭遇，被佢地「再思想教育」後，有尐野，我諗通左，開始知道點解係「不惑」。

所以，我寫呢個專欄，分享我一段段賺人熱淚的愛情史，希望教育下大眾，千禧年後的大陸人，唔係你平時印象中咁樣。下星期，同大家分享下我與第一個港漂女友的第一段情。

（本文純屬作者意見，不代表香港01立場。）