【武術01】聖誕約仇人出嚟打場交？

聖誕節大家都係同朋友食飯、行街、睇戲，頂多都係搞下party飲下酒，或者好似我咁練拳、做下運動之類，其實來來去去都係呢幾種。你話如果可以約個有仇口嘅人出嚟，打場交，兜口兜面「解決」件事，你話幾好呢？好可惜，香港無呢個傳統，不過，如果移民過去秘魯，你就可以滿足參加聖誕fight club呢個願望。

瓊比維卡省（Chumbivilcas Province）係秘魯入面嘅一個省份，位於安第斯山脈地區。入面嘅居民每年12月25日都有個活動，叫Takanakuy，有人話係「互打」嘅意思，亦有說是「當血液沸騰」嘅意思，不過呢個唔重要，因為件事其實就係「大小朋友齊打交」。

居民會用打拳頭交嚟解決個人、朋友、家庭或者地域間嘅紛爭。即係，你睇個同事唔順眼好耐，平時見面都已經「乜口乜面」，有心結又未解決，你就可以約佢聖誕當日出嚟打返場，將佢塊面由「乜口乜面」打成「物口物面」（文雅地講，就係物化佢個樣）。亦可以約朋友打返場，增進友誼。

有片大家睇，內容有打交鏡頭，請留意：

呢個活動大人、細路、男人、女人都可以參加，只要你條氣唔順，無仇口都可以搵人打返場。雖然聽落好自由，但Takanakuy都係有規則嘅，例如「唔可以咬人」、「唔可以打落咗地嘅人」、「唔可以扯頭髮」等，同時，有類似裁判嘅工作人員去控制場面，亦有警察在場。好似好暴力，但其實係個非歡樂嘅節日，又音樂又有人跳舞，當然仲有好多酒。打之前同打之後亦要握手，好有禮貌㗎。

習俗呢樣嘢，各處鄉村各處例，可能有人會覺得好暴力，但當地居民就覺得呢個係解決紛爭嘅好方法。我唔係提倡用暴力解決問題，但如果用呢種方式解決紛爭而唔洗打仗，同仇人又「解決咗件事」，在場又有警察又有裁判，都不失為一個好方法。覺得太暴力嘅，咪戴拳套喺擂台打囉，身心都健康。

如果香港有

我喺到諗，如果香港有呢個傳統，咁特首同一眾高官嘅booking，真係十個聖誕長假都搞唔掂。例如：

有一些界別它沒有任何經濟貢獻，譬如說宗教或者體育，它在我們的選舉制度當中亦有參與，這使得我們是均衡參與。

「今時今日，家長唔滿意學校操TSA，大可以唔去讀同轉校。」

我都費事講因為怕老尷就可以唔洗諮詢呢單嘢，再講落去2017都到。

單單呢幾句，我估禮賓府同政府總部外面兩條隊，真係可以沿住南港島線由金鐘落去海怡半島，發現唔夠位之後再反彈排返上去沙田。不過，就算有呢個傳統，官員們都可以喺呢幾日放假上去北京遊玩，或者選擇唔放假，上去北京做嘢之類，最後避咗件事。

認真講返，香港無呢個傳統，大家唔好以身試法。唔講衰嘢，過咗聖誕，嚟唔切同大家講聖誕快樂，用呢個機會同大家講句新年快樂！希望2017會更好！

今日係咁多！

（本文純屬作者意見，不代表香港01立場。）