愛情令人陶醉、興奮、感到甜蜜，甚至帶來攻擊性！好多時，女仔單純以為能逗心儀嘅男仔笑，男仔就會喜歡上佢。

睇呢個專欄前，先提醒大家一句，若你係深信愛情係一生一世，甚麼專一唔花心之類，請你返出去！

記得中三四個陣，我做跟車，坐司機旁個陣成日聽司機用部香蕉型Nokia手機，好溫柔咁同佢係大陸娶返黎個老婆講，今晚會返黎食飯呀，佢地老婆耐唔耐又會搵下佢地，令到我好憧憬娶個內地老婆。

古語云「執子之手，與子偕老」，這句傳頌千古嘅雋語，係好多人一直以來對愛情嘅憧憬。但係，係我大學時代，諾貝爾醫學獎頒獎俾一位瑞士學者，佢有關多巴胺嘅研究令我發現原來所謂愛情，係受到大腦內多巴胺嘅影響。人類藉由佢黎傳遞戀愛中亢奮同歡愉感，「愛情」只係多巴胺分泌多少嘅生物化學結果。從化學觀點看，話愛情係興奮劑，甚至話係毒藥都不為過。愛情令人陶醉、興奮、感到甜蜜，甚至帶來攻擊性！

2006年，我由北京讀完書，回流返黎香港工作左幾年，係呢年年尾轉去一間私營機構工作。

第一日返新工，上司介紹完流程，我就埋位執野，我當時個位望到茶水間，就係我不經意抬頭一望那個方向，見到一個阿娜優美嘅背影，呢個背影，係我到目前為止一生人見過最索最吸睛！背影斟完水一轉身，行走挺項，俏步徐行，雙手拿著熱茶向我而行，女孩用帶點鄉音嘅廣東話，眼神炯炯咁望著我同我打招呼：

「新同事好，我叫玲玲！」

有人話係張愛玲講：「人生有時候，總是很諷刺。一轉身可能就是一世。」

玲玲是重慶人，一如典型重慶人個子嬌小。俗語話食得辣，皮膚白，未知係咪因為重慶濕氣重，所以多食辣野嘅重慶妹，皮膚特別白滑。玲玲十五六歲已來香港，考過會考，來港未足十年。玲玲坐我後斜角兩個位，我地二人好投契，大家經常連人帶凳「轆」過對方個位搵大家吹水。玲玲喜愛下廚，經常炮製美味小食，與我分享。

可是世事無咁完美！如果大家吹下水，應該無乜野。但係，當你有呢啲遭遇時，你知道有唔對路：

玲玲會開會時主動坐你隔籬，開開下會無端端拎左你杯水黎飲；一大班同事圍住電腦講八婆野，玲玲條腰好似無力咁成個「哎」埋黎；成日都會俾短訊你問你近況，重點係，你回佢個陣佢好有心機覆你，而唔係「嗯」、「係咩」等敷衍字眼(當年仲未有Emoji，唔興回公仔符號)

無錯，玲玲溝梗我！你地可以話俾女溝，有乜所謂？但係我仲未同大家講，我當時係有個港女女友Suki。港女唔係依家的巴辣女，係指我女友係香港土生土長，出身小康之家，係港大畢業嘅女友。我與Suki拍左唔夠一年拖，就遇到玲玲。

我想在此講講先，我未去到咁衰想享齊人之福，但係我個份好似張無忌的性格，在情場上遙擺不定嘅脾性，害苦左所有人。

玲玲為左追我，好主動，周不時會係大時大節，或周五六晚上發SMS俾我，用字親匿。係我未圍意佢追我個陣，有次我帶佢上黎我屋企坐，我落左街買野，掂之返黎我發現我個凌亂嘅「狗竇」執得好乾淨，而當時玲玲幫梗我洗廁所！無錯，Suki都無對我咁好。後來，兩個女人火星撞地球，有次玲玲殺上黎我屋企，Suki又係度，兩個女人都要我表態，Suki好似崩潰左咁喊，當時我心好煩，隔硬趕走左玲玲。

事後，我經常在呢兩個女人身邊轉來轉去，無辦法即時拒絕其中一個。

好多時，女仔單純以為能逗心儀嘅男仔笑，男仔就會喜歡上佢。在玲玲和Suki之間，我最後選了Suki，玲玲輸俾一個會讓男人難做，只懂向男人哭哭啼啼嘅Suki。(故事未完睇埋圖下面個段先！！)

當年，我經驗少，左右做人難，為左唔想再聽到Suki傷心嘅聲音，我選了喊包。

但，多年情場打滾後嘅今日，我可以好肯定答你！我好後悔，梗係選玲玲啦！做乜姐？梗係搵個令我開心，做乜搵過淨識喊令我心煩嘅女人？依家試下再哭哭啼啼呀！我會鬧爆佢：「頂！夠未呀仲喊？仲喊即刻分手呀！」

本欄目逢每月1、11及21號出刊。

（文章純屬作者意見，不代表香港01立場。）