第一槍示警後未能即時收到預期效果，暴徒繼續向倒下的高級警員攻擊，再次向天開槍示警，情況合理。當第二槍發射後暴徒開始後退，並停止攻擊，警員已即時收回佩槍，表現專業。

2.8 旺角事件令我昨晚完全瞓唔到，睇住一幕幕韓農式嘅襲擊，令人心痛。

放生小販是合情　但執法是合法

先放低個人情感，從件事始末嚟睇，長久以來農曆年初一二三期間，食環職員放水唔拉小販好合情！等同原居民祭祀燒炮仗，初一二有村民燒煙花添，咁都唔拉啦！潛規則大家都懂的！

今次咩事要年三十開始執正嚟做，俾人搵到位搞，等食物及衞生局日後再解畫。不過，近幾日本土派已經不斷四圍挑起事端，包括去商場影響市民入場睇電影，又去SPCA搞事。

其實支援旺角小販只係藉口，唔告放水可以話合情，但不合法理，講到底，有人犯法，有人執法，衝突何在？就是政棍到場推波助瀾，煽風點火！

從傳媒影像中得見，晚上11時，小販對警方的抗爭已經大致平靜落嚟。但到12時左右，本土派到場要求聲援小販，被警察驅趕便開始衝突！

現場影片清晰拍下開槍前後

衝突一開始不久，便有車運送盾牌等物資到現場，似乎係計劃好嘅行動。警察多次嘗試驅散人群，但衝突繼續升溫。接近凌晨1時半，本土派人士（多名穿着藍衞衣帶口罩）開始帶同自製盾牌衝擊警方防線，並開始將垃圾桶、卡板及雜物等，推出亞皆老街。有帶口罩人士分別於不同位置，把磚頭及玻璃樽掟向警務人員，場面形同暴動。期間數十名本土派人士與一隊交通警發生衝突，不斷用卡板、垃圾桶及圍路板掟向警員。

影片清晰可見，警方明顯人手不足。當時眼見大約有8位交通部警務人員在場。由於襲擊不斷，交警向後退，但仍然不停被追打及掟雜物，其中一名高級警員被掟中頭部，失去平衡倒地，該名高級警員嘗試起身，但背後再被卡板及一塊木板掟中頭部即時倒下，我判斷，該名高級警員應該是失去知覺，因為倒下之後，其背部再被多塊卡板掟中已再無反應。其同袍見狀已經多次發出警告，要求襲擊者退後，警告不果，才向天開槍。「警察通例」（PGO) 29-03 中「警察槍械的使用」有述：

「不能以較溫和的武力來達到目的時，才可根據下列情況使用槍械：* 保護任何人/自己，免生命受到威脅或嚴重傷害；* 拘捕任何企圖逃避警方拘捕的人，而該人屬警務人員有理由相信剛犯了嚴重暴力罪行的人；* 平息騷動或暴亂。」

我個人相信，當時警員開槍時，已經考慮上述因素。他開槍示警時，明顯在保護同袍（倒下的一名高級警員），以免同袍命受到威脅及再受嚴重傷害，加上當時情況失控，考慮不能以較溫和的武力來達到控制韓農式騷動，才向天開槍示警。在第一槍示警後未能即時收到預期效果，暴徒繼續向倒下的高級警員攻擊，再次向天開槍示警，情況合理。當第二槍發射後，暴徒開始後退，並停止攻擊，警員已即時收回佩槍，表現專業。

今次暴徒的行為，其實已超越一般香港市民可接受抗爭行為的底線。究竟咁樣抗爭落去，香港會變成點樣？此外，我希望提醒各位讀者，今晚如非必要，應該盡量避免去人多擠迫嘅地方，並小心個人安全。我認為今晚最好節目，應該就係留喺屋企睇煙花，順便思考一下香港未來的方向！

【編按：作者鄭承隆，是監警會宣傳及意見調查委員會前主席，並為新思維副主席。】

（本文純屬作者意見，不代表香港01立場。）