作為一隊球隊嘅球迷，相信除咗贏波拎冠軍，又或者成績喜出望外值得高興外，最值得球迷們興奮以及期待嘅時候就係轉會窗！尤其係一眾有錢或豪門球隊一到咗1月冬季轉會窗，同埋由7月1日開始到8月31日結束（會因為假期已延後日子）嘅夏季轉會窗。有時淨係聽到心儀球員嚟嘅傳聞已經夠開心。不過大家喺睇轉會新聞時，都會經常見到兩隻字：「體測」。相信大家都見到每個轉會球員要正式簽約加盟前，都要先過呢一關，究竟體測係咩嚟？等洛迪高為大家介紹返！當然，每間球會做體測嘅方式都有啲唔一樣，但有啲檢查都一定要做！

文：洛迪高＠世界波

1. 心臟測試

隨住而家球壇不時出現有關心臟病發的悲劇，所以測心臟就好緊要，因為牽涉到球員生命！要做心臟測試當然唔係叫球員去跑個90分鐘睇下有冇出事咁簡單同原始啦！大家平時見到皇馬體測時班大帝心口貼住貼紙加線，其實就係睇心臟情況，好似有無雜音，佢哋都會作少少慢跑，睇番運動時心跳上限同下限。除咗轉會需要外，而家過24歲或以上嘅球員，都獲建議要接受心臟測試（但係咪間間做就未必）！

2. 傷病紀錄

想知球員易唔易受傷，除咗做檢查外，睇番佢以前嘅傷病史都略知一二！買家球會當然唔會係睇報紙或者Google啦，緊係直接聯絡賣家球會提供資料（你諗嘅野同我一樣，就係其實賣家球會係可以有所隱瞞……）除咗競技上嘅傷患，新老細嘅隊醫仲會拎埋球員嘅病史，慎防隱疾。

3. 例行公事

有啲例行公事都係要做嘅，例如驗血、最大攝氧量、有氧代謝能力、肌力測試及肌肉長度、膝蓋伸展度、關節活動度測試、骨骼測試、血壓、身高體重、牙齒狀況、身體脂肪比例甚至聽力同視力。踢波啫，不用分那麼細﹖錯喇！尤其係肌力測試、肌肉長度及關節活動度測試就要由位置劃分，例如隊醫會由唔同位置判斷重點睇嗰位球員會經常用到咩關節，該關節就要特別留意有冇舊傷患或有唔妥，好似龍門咁，睇係睇你手嘅關節靈活度啦！

至於睇牙，唔係睇黃唔黃同蛀牙咁簡單，因為而家好多球員受傷好耐都好唔晒，原來係關牙事，事關有機會影響神經線導致其他痛症及受傷。例子就有法國後衛阿里施素高（Aly Sissoko），曾經有機會去AC米蘭，但因為牙有事，就算其他合格晒都畀A米彈鐘……

體測的個別事件

希古恩去哪兒

近年阿仙奴喺轉會市場畀人笑傳多過真係買，2013年希古恩（Gonzalo Higuain）由皇家馬德里投入轉會市場時，阿仙奴一直被指無限接近，而且仲去到體測階段，不過結果佢都係去咗祖雲達斯，所謂去阿仙奴體測成為唔少人笑柄，例如話當時阿仙奴獎盃櫃塵封多年搞到希古恩氣管有問題，搞到體測衰咗……

預言成真……

體測失敗唔常見，而好似預言咁搞到轉會告吹球員及後真係受傷就真係罕見及吊詭。曼聯前神鋒雲尼斯達萊（Ruud van Nistelrooy）2000年時本有機會由PSV燕豪芬加盟曼聯，曼聯因為佢早前膝傷導致體測衰咗，希望雲佬可以先踢一場比賽證明無事再簽，但PSV就拒絕而令轉會馬上叫停。點知人算不如天算，雲佬之後就喺練習中弄傷前十字韌帶要抖成季。幸好愛才深切嘅費Sir同曼聯翌年照簽雲佬，仲成功通過體測，令雲佬感動非常，之後嘅故事就唔洗多講啦。

另一單預言就係阿根廷前鋒迪亞高米列圖（Diego Milito）細佬加比爾米列圖（Gabriel Milito），佢本來有機會喺2003年加盟皇馬，不過因為之前受過膝傷，皇馬覺得有風險所以體測後彈鐘，最後佢就去咗另一西甲球會薩拉戈薩（證明每間球會體測都唔一樣啦）。然後去到2008年效力巴塞隆拿時，就真係出現膝傷要休戰半年……

下，乜你有傷？

有時唔係刻意隱瞞，而係賣家球會同球員都唔知球員本身有身體毛病！

阿仙奴前鋒簡奴（Kanu）於1996年轉會國際米蘭做體測時，居然發現自己有嚴重心臟問題，要做手術換心臟嘅主動脈瓣。出名對球員有愛嘅國米主席莫拉堤（Massimo Moratti）就無彈鐘，夠晒包容。不過簡奴喺99年轉會阿仙奴前，僅為國米上陣12場入1球……

最近一單就有多蒙特中堅蘇保迪（Neven Subotic）！話說佢今季季前差啲轉會米杜士堡，但喺米堡體測中就發現佢肋骨有傷，結果佢要返多記做手術養傷，直至而家先啱啱復操。

既然大家對體測了解多咗，咁就知點解有時班球員要著騎呢網狀背心，兼貼滿晒唔知咩貼紙啦！

（文章純屬作者意見，不代表香港01立場。）