上星期同大家分享咗辭職要識分老闆所比嘅offer同fake hope，交信後除咗傾去留問題，仲有無其他嘢好傾呢？老闆一定問「點解走呀？」、「係咪做得唔開心呀？」，呢個時候講唔講真話好呢？

相關文章：廢青辭職攻略：獲挽留不要沾沾

想有彎轉，最緊要坦白

好多人怕將內心說話「人工加太少」、「等極都無得升」講出口。可能係面皮薄，怕唔好意思，又可能係覺得講咗都改變唔到啲咩，你錯啦！講咗唔一定改變到，但得到改變嘅機會絕對唔係零！坦白，有時會幫到你由迷茫慢慢步向清晰……

但向老闆坦白之前，首先你要向自己內心坦白，分清自己係因咩原因走：做得耐悶悶哋，無咗衝擊同熱情？公司晉升路差？人手嚴重不足，你一直頂得好辛苦？呢啲原因，到辭職嘅時候不妨照直講真話，因為呢啲都唔係「肯定無得改變的事」。

日日做住相同的工作，做咗幾年都無轉變，除非你係等退休狀態，否則悶同厭係人之常情，將感受坦白講出嚟，其實公司調你去第二個部門接觸新事物係好容易嘅事，咁你就可以識多咗新知識新技能。如果唔係太憎公司，都可以接受吓呢個建議，因為新工作有可能激發到你自己都唔知嘅潛能或興趣，將來再跳槽個牙力都大啲。

另一方面，都唔少老闆知道離職同事感覺之後，願意請一個平平地fresh grad返嚟執頭執尾，或者加你少少人工，都唔係你想像中咁難，咁點解一早唔請多個人／加你人工？喂，你都無要求，佢側側膊又好正常，但當佢真係覺得唔可以無咗你，而且內心算一算，都慳咗咁多年啦……既然拖無可拖，而家拎返本來就應該洗出嗰舊錢出嚟都唔出奇。

所以，如果你都有覺得可以留多陣，辭職前／辭職時坦白講出內心感受，有彎轉不是夢。

誠實都要聰明

坦白有好處，但唔係叫你臨走搬弄是非。要「選擇性坦白」，個標準係，要說「對自己有益，同時對其他人無害」的話。無論公司有幾衰嘅人、你忍咗佢幾耐都好，唔使你講，大家心照，你老闆做咁多年人，佢都都有眼睇邊啲係麻煩友（只係佢睇到但唔處理），所以唔需要臨走數哂出嚟。

你數同事，老闆唔會為咗留你而炒佢，但會覺得你負能量好重，繼續留低都怕你影響士氣，既然你都交咗信又咁大戾氣，好可能選擇放你走就算啦。咁樣對你自己一啲好處都無，他日某地撞返今日同事、上司，就更加尷尬，同埋個世界咁細，你真係唔知自己幾時有需要搵返佢地幫手的。

【相關文章：世界圓又圓，職場忌隨便睇唔起人】

給HR的話

最後，我有少少「給HR的說話」。一間公司請人要經人事部，唔少大公司離職都要經人事部，循例問吓：「點解走」，又比份表格你填，話用嚟檢討，但好多時你都睇得出佢無用心同你傾，甚至佢眼神都流露着「我都好想走」的訊息。

如果個員工真係最後都決定走，請你地真心了解吓個原因，認真填份表，同專業地向大老闆檢討和反映。如果某啲部門不停有人走，整體嚟講離職率比其他部門密，斷估唔會係風水問題令嗰組人特別容易「阿爺有病」、「搬屋」、「小朋友返學無人湊」啩。你們的正視和認真，捉出垃圾經理、檢視嚴重超標的工時，分分鐘拯救成間公司，所有同事嘅士氣就主宰喺你手。

篇幅有限，無可能舉得晒所有公司的例子，我知HR們實有意見，大家都係打工仔，歡迎去我Facebook討論一下你的職場心得。

（本文純屬作者意見，不代表香港01立場。）