林鄭月娥造勢大會，我呢啲小市民當然只能喺facebook睇直播，但我估唔到隔住個mon都感覺到佢chok，chok年青、chok風趣、chok貼地……為得到一份工而將自己chok成另一個人，咦！其實我同你都試過，人生如戲，人生亦成日要交戲，特別喺見工／爭取升職時，呢啲場合人人都知你交緊戲，點樣喺對方已知嘅情況下，將啲戲做得真啲？

疏理自己特質，避重就輕

幽默感呢樣嘢係要時間培養，我諗林太一向都唔係走幽默路線，「正經」、「硬淨」其實唔係罪，包裝得好一樣可以變成受歡迎嘅賣點。偏偏，唔知點解成個造勢大會都要耍幽默，當林太帶笑咁話西貢人形容佢為「西貢嘅外嫁女」，我諗大部份人都無共鳴同唔明笑點喺邊。

一個幽默嘅人的確係會令人喜愛，但如果唔係自己強項就真係不如罷了，需知道大家都好怕老闆講一啲唔好笑嘅笑話，然後要比面發出好假的哈哈哈笑聲。又例如造勢大會個司儀介紹自己，特別提到自己係前香港劍擊代表隊，仲要重複：「你無聽錯，我係劍擊隊」OK，我估呢個係幽默位，但出到嚟個效果就係……笑就對唔住自己良心，唔笑又驚傷你心。幽默係好難的，所以黃子華啲飛賣到咁貴都賣斷，唔識幽默並唔係咩缺點或災難，但要接受同面對自己係一個點嘅人，喺公開同重要場合，唔專嗰樣就避啦。

例如見工，你明知自己英文唔叻，就唔好講講吓中文扮外國返嚟夾幾隻英文落去，仲要讀錯音，無謂最後迫到個interviewer同你講「不如我地用英文interview？我想知道你大概程度。」結果就是自暴其短。

Chok唔緊要，做足功課先

林太想sell聆聽年青人說話，營造打成一片感覺，出發點好合理但有個畫面好突兀，就係佢同班後生仔high five，喂！真係有後生仔同人見面嗰陣咁樣做㗎咩？香港喎。事前有無接觸過「真．年青人」？

見工都係，我當你入護膚品公司做文員，見工前都應該有基本護膚知識，上網睇吓公司主要競爭對手係咩、最近出咗咩新產品？你連潔面乳同潔面粉都唔識分，如何令僱主信任你場戲係有誠意呢。淡定自信

要說服別人，當然先決條件係你要說服到自己，「淡定」同「自信」，對於見慣大場面嘅林太嚟講當然無乜難度，但對於唔算成日見工嘅你，難免會緊張，所以見工前其實係要熟讀自己CV，諗真自己每份工工作內容、負責咩嘢、有無威水project值得拎出嚟講、有無幫公司解決過咩困難危機等等，仲要試講試練，流暢除咗令聽嗰個人舒服，亦係增強自信良方。

一番說話真唔真誠，對方好易睇得出，林太好真心咁話佢半夜去便利店買唔到廁紙，佢真心覺得呢個故仔係值得同大家分享，所以無人懷疑佢講大話，唔會懷疑佢係交緊戲。你對住老闆都一樣，只要你真心覺得件事要提高成本先完成到，就無人會懷疑你講大話，即使佢唔相信你能力，都增加對你誠信，過去五年，香港人知道誠信比能力重要。(作者Facebook)

（文章純屬作者意見，不代表香港01立場。）