女人要男人死嘅方法千條萬緒，歸根結底就是一句話：求而不得！上海妹不愧深諳「貧窮不是社會主義」呢條道理。不得不承認，讀哲學係會讀蠢人。

本欄目逢每月1、11及21號出刊。

上期講到祁壹離開香港無耐，我好掛住佢，決定請幾日大假去上海搵佢。

雖然同佢睇戲我係感到有啲悶，但無辦法，我Lum佢，我跪低我受！祁壹有上海女性個份高貴，但無上海女人個份做作。我靜靜雞唔俾佢知，專登申請大假飛去上海搵佢，點知去到佢屋企見面第一刻佢唔係有驚喜，可能你地都會估我見到嘅野可能仲大驚喜，無錯呀！但唔係佢係上海有個男人，而係佢由第一刻見我開始，就係咁有啲嬲咁「鵝」我做乜放低份工走去搵佢，叫我快啲返香港返工，不停抽我水，揶揄我！！

呢次上海之行我領略到一樣野。女人要男人死嘅方法千條萬緒，歸根結底就是一句話：求而不得！

記得以前睇大台《金枝慾孽》，戲中女角黎姿話女人要迷住男人嘅心最高境界，就係要對佢「求而不得」。呢次，我終於瀨野。呢幾個月黎，我未試過咁鍾意一個女人，未試過咁落心落力去維繫一段感情，未試過咁丑盡六壬去逗女友歡心。無論我點樣做都好，我已經將我所有俾左祁壹，但係祁壹總對我有份保留。例如講電話，只有佢要求掛線、又例如買衫個陣，佢好有主見唔會問我邊件好，亦從來唔准我代佢俾錢。我多年黎係女人身上嘅追女橋，唔太Work！

讀哲學係會讀蠢人

不得不承認，讀哲學係會讀蠢人。我細過家境唔好，自少無乜人理通街玩，中三四已經幫人跟車搵外快。當年大我好多嘅老表家境比較好，我有時跟老表去佢有錢老細屋企玩，因為我細過係一個好盞鬼嘅死肥仔，所以好得成班名流闊太鍾意，成日周旋於佢地之中。我唔怕講，我自細份人好古惑，但後來大個鐘意讀哲學，開始探索人性，我就越來越蠢，少左個種小聰明。依次同祁壹交左心，我好明顯處係下風，我樂意佢向我予取予求，但基本上佢不斷取走我嘅思緒，而從沒取走我一分一毫。

係上海個幾日，除左佢返學嘅日子我會周圍行下外，佢一放學我就陪佢，應該話係佢陪我周圍走。上海外灘，因為供電問題，並唔係我地成日睇咁晚晚燈火通明，只會每周某幾晚長開幾粒鐘燈黎照遍外灘兩岸。我臨返香港前個晚，我地係餐廳晚飯，佢同我講，好開心剛收到通知美國個邊有著名學院收佢讀電影研究，快的話佢過多個兩三個月會過去，去佢美國個邊親戚打點。佢問我有無諗過將來都過美國發展？個剎那我都唔知點？甚至唔記得點回應，總之搵啲說話搪塞過去。

就係上海搵完祁壹返黎無耐，有晚我收到佢嘅電郵，佢叫我唔好為佢付出咁多，不如我地做返論學問嘅筆友。

呢年幾黎，我同祁壹雖然成日討論張愛玲嘅話題，但當我正式同佢去到講感情嘅時候，喜歡張愛玲嘅佢，並無好似張愛玲咁為愛情而付出痴情，愛到忘記自己、愛到失去尊嚴；亦無另一個佢好喜歡嘅阮玲玉咁係感情上示弱，為愛情尋死叫活。佢只係好冷靜，好理性咁去對待我地嘅感情。

不過，可能呢個係鍾意文藝，又鍾意哲學嘅人嘅特點之一，就係佢地唔鍾意將到手嘅愛情落到實處，喜歡係空虛同埋幻想中度日？呢一點，我只有疑問，沒有答案。

與祁壹嘅交往，令我學識到對某種女人黎講，男人應保嘅神秘感。小英同埋祁壹兩次嘅遭遇，令我諗起上海女仔係咪鍾意男人外熱內冷？回憶返祁壹對我嘅說話同點滴，令我開始諗到愛情理性嘅一面，係熱情以外亦都開始考慮今後嘅物質條件。

上海妹不愧深諳「貧窮不是社會主義」呢條道理。

自問情場一直略為得意嘅我經歷呢次遭遇(講白啲係挫節)，卻有所領悟。哲學家拉康話「欲望乃是他人」，我反思自己溝小資女，未必係因為自己想要，可能純粹溝黎係要換黎朋友嘅羨慕。我嘅欲望越大，女人越對我無興趣。我開始學習去留意平時唔習慣留意嘅野，自我反省去檢視自己睇人方式有無錯、偏見？

我同祁壹以書信而結緣，亦以書信黎了份。

收到呢封信個晚，我唔記得左係因乜事我搭小巴去某個地方，小巴內收音機緩緩響起黃耀明嘅《身外情》......

「緣是鏡中花，留在鏡中死， 原諒我不記得忘記。」

直到今日，我仍未忘記。

(下期待續)

（本文純屬作者意見，不代表香港01立場。）