男人買波鞋來炒，大家一點都不會陌生，但小妹對呢個唔透明，甚至我會稱之為造市的market，沒甚好感。點解？因為……

小妹本以為買鞋只是女人的天性，但最近發現枕邊人在鞋櫃的鞋比我更多，不禁講左一句：「你邊有咁多隻腳呀？」

他的回應是：「攞黎炒㗎。」

男人買波鞋來炒，大家一點都不會陌生，因為咁賺錢買花俾女友戴的，大有人在，某程度上我都是受惠者之一。但小妹對呢個唔透明，甚至我會稱之為造市的market，沒甚好感。

鞋市人為操控　脫離基本面

點解？因為先係來貨被完全操控。好多炒得起的鞋，在我來說沒甚美感，炒得起是因為造鞋商控制貨源，往往未推出就在網站俾人抽籤。有幾何中獎？我唔知其他人，我幫枕邊人抽幾十次，就一次都無中過。情況就好似細價股，貨源歸邊，炒高幾廿倍，脫離基本面。

再者究竟隻鞋市價值幾多錢呢？旺角一個價，yahoo拍賣場一個價，要唔俾人price discriminate，price searching的時間成本相當高，所以令我一直對呢個炒賣市場卻步。

不過枕邊人在我對住個鞋櫃黑面期間，話我知有個叫STOCKX的網站，有哂所有波鞋過往的交易記錄，買家同樣可以開價，令我即刻對呢個市場好有興趣。

波鞋交易網　賣家買家都有say

STOCKX前身是CAMPLESS，它在全球擁有最多波鞋的交易數據，以往每季公布一次波鞋價格報告。創辦人幾個月前才構思這個網站，不出幾個月就實現了，目前為17000個鞋款提供報價服務。

睇網站的layout，十足十財經網站，有個走馬燈列出各種鞋款的升跌走勢。更有Jordan Index、Nike Index等等，相當於恒指同國指報價。仲有Market movers，顧名思義就是波鞋的異動股。想知道有咩新款鞋推出？就有同IPO一樣的ISO（initial sneaker offering）calendar啦。

網站最大賣點是不讓賣家主導價格，好似睇股票報價機一樣，有實時的bid price和ask price，買家想用幾多錢買隻波鞋，完全公開，讓買賣雙方尋找一個fair price。網站亦會為會員認證波鞋的真偽，確保在平台上買賣的二手鞋都是原裝正貨。

創辦人希望日後能將服務擴展至不同貨品。我最希望香港樓市有呢種交易平台，買家有say啲，大家上車都易啲啦。

【編按：筆者為八十後財經公關，大Deal細Deal通通做，business trip出唔完，新聞稿寫唔晒，但見盡銀行家、公關傳媒界的奇怪異事。】

（本文純屬作者意見，不代表香港01立場。）