係人都知阿媽係女人，做人最理想當然係成世都唔得罪任何人、同全宇宙都係朋友，但老掉牙的道理是：「無論你幾盡力，都無可能討好所有人，總有人唔鐘意你。」但辦公室內有D人，你真係盡量唔好得罪之餘，仲要最好同佢地「有兩句」，特別係新入職嘅你。

Receptionist——掌握全公司關係圖

對於門口的Receptionist，你通常都係寄件、收件先同佢有公事上接觸，否則一般都好少特登行出門口吧？但其實Receptionist掌握老闆日程、習慣；又掌握公司各人關係圖甚至係私人資訊，例如，公司某對男女同事發展緊地下情，日日前後腳或者間中約喺消防後樓梯偷見面，坐佢隔離個同事都未必知，但Receptionist就一定見到。

再者，喺一個200人辦公室入面，你未必識哂所有人，但Receptionist就一定認到所有人，而所有人都一定識佢，你係無從發現邊個老闆、仇人、貴人原來同Receptionist好friend，點解Ｄ人會知道你某次走出lift口聽另一間公司ＨＲ電話？可能就係Receptionist目擊了。 　Jennifer係唔抵幫，佢每日返工都遲到20-30分鐘，佢咁放肆係因為公司唔洗拍卡返工，即係返工遲到無記錄，加上佢上司亦隻眼開隻眼閉，覺得佢每日完成到工作就OK。點知有一日，Jennifer上司突然叫佢入房：「Jennifer你以後早Ｄ返啦，雖然我個人唔介意，但隔離部門阿頭投訴呀，話我無好好睇住同事紀律，容許你遲到，係對其他部門、其他準時嘅同事唔公平。」職場就係好多厚多士，食飽搞風搞雨。

Jennifer就諗，隔離部門明明喺office另一邊，點解會見到佢遲到？原來就係Receptionist唔抵得Jennifer可以遲而自己要準時，所以「做佢」。

茶水姐姐——最強天文台

千祈唔好睇少茶水姐姐的收風、放風能力，老闆開會，茶水姐姐斟茶行出行入，有時就係咁岩比佢喺入房嗰一兩分鐘聽到重要情報。

除此之外，公司上上下下有是非要講，或者要八要hea去邊丫？唔計web whatsapp，就一定係茶水間同廁所！普遍人覺得茶水姐姐同自己工作利益無衝突，而且是非又唔係真係大機密，都會唔避忌，照喺茶水姐姐面前講，阿姐姐聽聽埋埋就掌握哂成個故事唔同角度，知嘅嘢比你多。

再者，茶水姐姐會幫同事洗杯、抹枱，佢係唯一一個可以去哂咁多個同事個位嘅人，由位上私人物品睇出每位同事性格、關係，加上成日喺茶水間，一有人嚟斟水又傾兩句，佢要放風真係好快。

Jennifer新加入公司兩個月，某日由同事口中聽到大家傳緊佢偷嘢，Jennifer大叫冤枉：「我幾時有偷嘢呢？」原來係有次要幫老闆拎嘢比人，Jennifer新入職唔知規矩，喺雜物房隨手拎咗個環保袋去裝老闆Ｄ嘢，點知個環保袋原來係茶水姐姐私人物品，姐姐發現唔見咗個環保袋就好嬲咁周圍問，結果Receptionist就話認得Jennifer拎嗰個袋係茶水姐姐嘅。就係咁，佢地就認定Jennifer不問自取偷環保袋，個處理手法並唔係去問Jennifer拎返／搞清楚件事，而係周圍唱唱唱，一個傳一個，Jennifer就被傳係新入職嘅賊了。

公司司機——位不高但權重

好多時公司司機都比秘書知道更多「老闆的秘密」，司機通常工時不定，主要係跟老闆日程，又知老闆住邊，接佢由屋企返公司、公司去情婦屋企、情婦屋企去阿女學校之類，喺車入面，有時老闆會訓、有時會傾電話或者同司機傾計。

又有時，幾個經理要一齊去某地點工作，都係會坐公司車，司機又係聽哂嚟緊有咩project，甚至係想升邊個炒邊個。

Jennifer老闆係心急人，有日預咗兩點要上車去中環開會，點知司機架車兩點十五分都未到，老闆就好燥咁要Jennifer打去催吓司機，司機塞緊車心情唔好，仲要比人催，結果就喺電話鬧爆Jennifer：「塞緊車呀！嚟到我唔嚟咩！條路唔係我架！大約等多廿分鐘啦！」無辜Jennifer收線之後向老闆報告要等多廿分鐘，結果又比老闆爆，左右受插。

而最無敵嘅係Receptionist、茶水姐姐、公司司機都係屬於「得閒嗰時好得閒」的工，佢地係會一齊傾計交換情報的，你朝早真係要記得同佢地講早晨呀。如果你都有職場求生心得，歡迎到我Facebook交流分享。

（文章純屬作者意見，不代表香港01立場。）