特首選舉提名期屆滿，新民黨主席葉劉淑儀最終因不夠提名而終止選舉工程，繼2012年後第二度鎩羽而回。由去年12月宣布參選至今的77日裏，葉劉經常為選戰而「爆seed」，由哭訴自己「有擔當」，到感謝民主派選委「雪中送炭」，再到不想見到「梁振英3.0、4.0」，可謂句句到肉。《香港01》與大家回顧葉劉競選期間的連串金句。

葉劉淑儀今日（1日）正式宣布停止選舉工程，記者會上她被多番追問是否因中聯辦干預或有人從中作梗，導致她沒法「入閘」，她就逐一點評各個對手，又回應「封殺論」。

「每個候選人都努力拉票嘅，有啲候選人個團隊特別龐大啦，有啲候選人就民望特別高啦，有啲候選人就出人意表，佢嘅政綱原來好受啲年輕選委歡迎。」

「我個人係樂觀啲嘅人來嘅，即係一個人最緊要保持健康、正面嘅心態，我就唔會話諗人哋封殺我。」

「世界總冇絕對公平嘅，我都睇得好開㗎…而家都唔可以話係公平定唔公平嘅，因為我知道每個人做事都有佢哋自己嘅苦衷嘅，係咪?」

「我就唔鍾意扮演悲劇角色嘅，我希望自己繼續好食好住，開開心心咁做人啦，我就唔會學你諗得咁負面。」

不過，葉劉早前點評對手時，就沒有如此客氣，多次暗批對手林鄭月娥和曾俊華。

「有參選人𠵱家唔係『三點不露』，係只露三點（政綱），係唔足夠㗎嘛，得三點之嘛，只露三點。」 葉劉淑儀評林鄭政綱－20/02/2017

「有參選人冇拎政綱出嚟，即係冇承諾任何嘢，又唔參加辯論，唔顯示自己嘅實力就排除其他人。」

「林太表現似足十幾年前嘅我，做慣官覺得自己咩都啱晒嘅，同唔同意見嘅人接觸，就同人開片，喺官場太耐，我當年都係，因為只係聽到一種聲音。」

「如果你只扮好人，那很自然就得到較高民望。」(If you just play nice, it's naturally easier to score higher popularity.)　

選戰期間，葉劉先是與民主派選委就政改和《基本法》23條立場相左，其後又因林鄭月娥參選，吸走大量建制派提名票。行政長官梁振英更大讚林鄭「有擔當」，令葉劉淚灑鏡頭前。葉劉一直在爭取提名票遇上不少阻力，不過，隨著提名期末段，開始獲部分民主派選委支持。

「例如我處理23條，我自己係有表現唔好嘅地方，我多次道歉，我亦都問咗責，我係問咗責，自動離開政府，冇厚顏、戀棧權位，而且我去深造，過去十年係回到曠野，各位都知道我由低做起，出錢、出力、出心，唔通可以話我對香港社會冇擔當咩?我覺得應該畀社會評論，我絕對有擔當。我做咗錯、做得不足嘅地方，我有承認我有道歉，有站喺街上要求市民一票一票咁支持。」

「非常感謝何先生對我的認同及鼓勵，他雪中送炭的這個提名，對我和團隊是極大的鼓舞，我十分感動。」

對於最終無緣特首寶座，葉劉淑儀強調無悔，屬非戰之罪。

「今次入唔到閘我真係覺得係非戰之罪，我諗入唔到閘係制度問題，1200票唔夠分啦。」

「作為一個走中間路線，希望做一個開明建制派候選人呢，係難免喺夾縫中爭取選票，我係喺矛盾同夾縫中爭取選票，我希望可以得到跨界別嘅支持，咁樣嘅策略當然係難度高啦，但我唔後悔。」

至於今次競選失敗，會否影響她與中聯辦或中央官員關係?日後會否捲土重來?

「關係應該基於互相尊重，互相信任囉。（日後關係會變好定變差?）咁呢啲關係就係睇雙方嘅，唔係睇單方嘅，啱唔啱？正所謂你對我好，我咪對你好囉。（但今次佢對你唔好，你會唔會對佢唔好？）我會睇大局，我唔係咁小器嘅人，因為我唔係『An eye for an eye, a tooth for a tooth（以眼還眼，以牙還牙）』嘅人，係咪？」

「有選未為輸，我梗係希望可以繼續作戰。」