【九倉Cut有線．博評】有線新聞　最好嘅新聞台

細個睇嘅係無綫新聞，因為佢免費，亦因為屋企只係睇翡翠台。大台嘅新聞報道員正襟危坐，個個似老師，晚晚同我講香港同世界發生咩事，我學習到乜嘢叫做「新聞正宗」。
大約十年前，裝咗有線，嘩，原來新聞可以同觀眾咁貼身、咁跳脫。從此我就成為有線新聞嘅支持者，差唔多次次開電視我都會睇咗有線新聞先，尤其係近年香港瞬息萬變而資訊眾多，揀信得過嘅渠道去接收資訊好重要，我相信有線新聞（非廣告）。
呢篇文，我唔講新聞台嘅取態，因為冇乜好講，亦都講到爛。我想講吓點解有線新聞係好嘢。

走在事實最前線

有線新聞台身為香港第一個24小時播放嘅新聞台，有佢嘅獨有節奏。早幾年以「走在事實最前線」做口號，差唔多日日都有直播，甚至俾人笑佢哋就嚟連街邊隻狗生仔都會開live。不過呢個就成為咗有線新聞喺嗰幾年嘅特色，個個記者同攝影師都係實戰型，佢哋可以帶觀眾即時用鏡頭去睇清楚事發現場，真係走嚟走去，主播就幫觀眾問喺現場嘅記者相關問題，了解現場情況。呢種係一種要練習先可以得到嘅能力同默契，乜都開live煉成咗更快速嘅人員，令到有線嘅新聞真係可以做到「最快最新」。

另外，有線新聞亦都令我知道咗記者做扒（stand-upper）嘅意義（做扒即係嗰段記者出埋鏡報道嘅片段）。做扒原來可以咁有臨場感，記者唔只係企定定講完就算，同個場地一啲關係都冇，而係可以令到觀眾更容易明白報道緊嘅事。記者會邊行邊講吓案法現場、用自己嘅出現令觀眾見到事物嘅比例、親身講吓隔住個螢光幕感覺唔到嘅感受等等，係一種將報道昇華嘅手法。不過依家無論係邊個台都好，好多記者都唔識咁做。「為做而做」嘅扒就愈來愈見得多。

新聞刺針、有線中國組 可一不可再

有線新聞近年作出大變動，將新聞專題節目《時事寬頻》同埋《神州穿梭》由「財經資訊台」拼入「新聞台」，將新聞台嘅價值再提升。前者變成不定時播嘅《新聞刺針》，後者變做周一至周五晚晚都有得播嘅《有線中國組》。《新聞刺針》唔再受每個星期半小時節目長度嘅限制，變咗不定時播放，有好多好處。第一，唔會再因為唔夠支撐半個鐘頭而犧牲咗一啲值得報道嘅題材，可以做「短打」。第二，記者採訪所用嘅時間就更有彈性，可以做長時間嘅調查報道，唔使趕住交貨。第三，節奏變得快，令到愈來愈冇耐性嘅觀眾容易睇、容易消化。《有線中國組》就軟硬兼備，令觀眾掌握神州大小事。兩者嘅質素都係其他新聞台難以匹敵（now嘅《政情》都好睇，呢個暫時有線冇做到）。

奇妙難接收新聞台

當有線娛樂新聞台消失，娛樂台愈做愈hea、電影台啲戲愈播愈舊愈重複嘅時候，我完全係因為新聞台先繼續畀月費睇有線。琴日（3月22日）見到一班有線新聞嘅前員工喺網上發公開信，叫管理層珍惜得來不易嘅有線新聞品牌，我完全感受到員工對前東家有幾咁愛護，佢哋亦都講咗我呢個忠實粉絲嘅心聲。

吳天海當日喺九倉股東大會宣布唔再注資有線，同時亦講過要等董事會做最後決定，先知道有線電視仲有冇得做落去。我個人對於拎免費牌嘅奇妙電視樂觀啲，畢竟都已經開咗波，冇理由唔播就話唔玩，事實上佢哋亦都繼續開緊鏡拍嘢。不過收費嘅有線電視我就唔抱咁大期望，就算奇妙接收新聞台嘅員工，力量已經唔可以同新聞台同日而語，至少冇咗24小時嘅時間去編排節目，機動性大減。陰謀論咁諗，有線做新聞單單嘢都去到咁盡，一定得罪唔少人，當中包括北方勢力。依家九倉壯士斷臂，會唔會係換個免費牌返嚟嘅條件？有線新聞九死一生，觀眾以後要得到全面嘅新聞資訊註定難上加難。

唔好浪費觀眾時間

如果奇妙電視真係繼續有得玩，佢就要製作同播放新聞節目。我希望奇妙可以向無綫新聞喺免費台播嘅內容做借鏡，千萬唔好學佢哋。尤其係之前播足45分鐘嘅嘅《十一點鐘新聞》（依家改返做30分鐘），真係睇到人都忟。日日都有「醫療專題」、「運動醫療」（後期呢個環節更加發展到唔關運動事都叫做運動醫療）。如果有時間，不如照搬互動新聞台《中華掠影》、《寰宇掠影》環節過嚟好過，睇吓中國大陸同世界發生咩趣事，而唔係浪費觀眾希望透過新聞報道去掌握天下事嘅時間。To Inform要做得好，首先唔好浪費大家時間同埋公共廣播頻譜，尤其係你做免費台只係得幾段時間播新聞，就更加要珍惜air time。

不過無辦法，大台覆蓋率最高，好多人冇睇過有線同now嘅新聞，連比較嘅機會都冇，又點會知邊個好啲？香港人，係咪真係唔配有好質素嘅新聞睇？

（文章純屬作者意見，不代表香港01立場。）