最想學到曹sir嘅係，原只於佢喺1984年叫人冇錢時，「唔食飯都要供樓」，同埋97年身體力行，叫人沽清香港樓。準，當然要學。不過更緊要係，嗰兩個建議，都係喺嗰個世代，完全冇人信嘅建議…自己信，就要講，人哋唔聽，就要更用心去講。

有次我去唔知邊個搞嘅聚會中，曹仁超曹sir都喺到。啱啱喺佢嗰段講普通話短片瘋傳後冇耐。我問曹sir：「曹sir，你驚唔驚你段講普通話短片教壞細路呢？」佢聽到，皺眉頭。

我就繼續話：「你證明咗普通話能力係點都好，一個香港人都可以係世界級！咁邊個仲會信唔學好普通話，就一定冇出頭呢？」我講完，佢就笑。

作為一個當年一畢業就做「雙失青年」嘅我，可能因為個人經驗，對啲經常性開支極度有戒心。始終對未來收入覺得會唔穩定時，唔好話份工，嗰個年代，連自己做開間公司仲喺唔喺到，都成問題，日日怕第日冇錢。每個月要俾，唔會斷尾嘅使費，可免則免。

經過嗰種洗禮，我一生差不多第一個自己俾錢嘅經常性開支，就係訂閱《信報》。點解？就係為一個專欄，曹sir個「投資者日記」。有好多日子，如果我只係有時間睇一篇文，就會係曹sir嗰篇。

我仲記得，當年開始喺股票行做分析員嘅時候，差不多第一個問啲前輩嘅問題，就係點解曹sir叫當時嘅特首董建華，做「綠化郎」。前輩呆一呆，先答我。我問點解前輩對我嘅無知好似好愕然，佢話，因為股票行內個個都追住個專欄睇，睇得耐嘅，冇人唔知點解，所以當有人無知問時，都呆一呆。

深信香港一套係世上「最掂」

曹sir係個深信香港一套係當今世上「最掂」一套嘅人。我作為獅子山學會創辦人之一，可以同大家分享，喺學會十多年歷史裡，只係得一個人，試過自發喺我哋網站下載入會表格，填好，連同已過戶嘅入會費入數紙，一併傳真去學會入會。嗰個就係曹sir。

我曾經問佢點解，佢話香港呢套，係個無需用外國人覺得要用嘅方法，例如福利主義、工資保障等，比外國更成功去提高市民嘅總體生活質素，呢個制度仲唔應該保護？

多年來，曹sir一定係我作為一個財經評論員最想學習嘅對象。記得十年前我入行嘅時候，同編輯傾，究竟我個新專欄應該叫咩名時，佢好有心機幫我諗咗好多個，佢叫我揀吓、諗吓，話最好「爆啲」。我記得就咁一句答佢：「欄名係咩冇所謂啦！曹sir嗰個都只係叫『投資者日記』。內容緊要好多。」嗰種對內容是一切嘅寫作態度，係每一個佢之後嘅晚輩都一定要銘記在心嘅做事方法。

財經評論員最想學習嘅對象

而我最想學到曹sir嘅係，原只於佢喺1984年叫人冇錢時，「唔食飯都要供樓」，同埋97年身體力行，叫人沽清香港樓。準，當然要學。不過更緊要係，嗰兩個建議，都係喺嗰個世代，完全冇人信嘅建議。香港資本市場好彩有曹sir呢種級數嘅人參與，如果係靠嗰啲97年為無殼蝸牛哭泣嘅評論員，香港資本主義早已崩潰。自己信，就要講，人哋唔聽，就要更用心去講。

最後，我喺《蘋果日報》嘅專欄「金手指」，係該報極少數純用廣東話寫嘅專欄。呢個選擇只係被challenge過一次，就係當年交第一篇稿時，編輯問：「純用廣東話寫專欄，你驚唔驚啲讀者覺得你唔認真同唔信你？」

當時，我就咁一句：「我特登抄曹sir㗎！」哈哈，再冇人challenge過我。

曹sir，好掛住您！Rest in Peace！

（本文屬作者個人意見。）