「DAN DAN DAN DAN DANCE FANTASTIC BABY」，每次聽到Bigbang 呢隻《Fantastic Baby》，都會忍唔住跟住UN UN吓，估唔到連孫慧雪囝囝Riley個半月人仔都識欣賞，雪雪上載一段Riley聽住歌手舞足蹈嘅短片，佢接受香港01訪問時話：「阿仔會跟住beat係咁郁，要大家注視唔俾人傾偈。」

小Riley 7月出世，至今其實得1.5個月大，已經開始識同大人玩，雪雪上載短片並留言話：「𠱁到啲姐姐咁開心，你真係fantastic baby﹗」仲Hashtag叫大家請留意舞步，見到Riley每下踢腳伸手都真係on beat，加埋笑聲同BB話，真係好療癒呀﹗雪雪接受香港01訪問時話，囝囝仲喺肚入面嗰陣，已經感覺到佢有好強嘅音樂細胞：「佢仲喺肚入面時，我每次睇電影，只要D音樂大聲D都會踢得好緊要，睇《美女與野獸》係反應最激烈最興奮。」

除咗鍾意郁鍾意笑，雪雪仲爆料Riley都好享受被人注視：「朋友上親嚟都播D唔同類型歌俾Riley聽，Hip Hop、R&B乜都有。阿仔好鍾意熱鬧，一多人就好興奮，好鍾意D Beat好重嘅歌，會跟住Beat係咁郁，跳舞俾人睇，大人唔望佢就用手拍人或者大嗌，要大家注視唔俾人傾偈計望電話，好搞笑。」

既然阿仔咁鍾意受注視，雪雪不妨考慮下做星媽喎，點知佢一聽到就耍手擰頭：「已經有人搵我地母子拍嘢，但自己覺得個仔實在太細，得1.5個月大怕抵抗力唔夠，始終去拍攝現場會好多人。宜家阿仔一餐飲180ml先夠飽，自己餵人奶泵都好大壓力，如果他唔夠就會瞓得唔好周圍搵奶，作息會亂晒，如果要出去拍攝，瞓覺同食奶時間比較難就，又怕佢做唔到導演要求，咁多嘢加埋，對BB來說太辛苦，唔係好想佢出鏡住，睇下將來再有無機會啦。」

阿仔就暫時唔會做星B住，不過雪雪之前就已經出返嚟做嘢，拍攝葉念琛執導嘅賀歲片，不過雪雪就話自己未正式復工㗎：「自己未係正式復工，係葉念琛導演話得一場戲問我去唔去玩下，自己覺得未收身不過一場唔想托手踭 ，出到去勁掛住係咁睇CCTV，拍完通宵返到屋企覺得個仔好似大個咗，應該要再隔一排先正式復工，唔想miss咗佢成長，一日半日嘅工作先考慮。」睇嚟大家想見到雪雪，唯有mon住佢嘅社交網站啦。