譚詠麟《刻骨銘心世界巡迴演唱會》Part 2情不變篇，今晚（22/9）舉行尾場，去到尾段，譚詠麟正準備唱由李克勤及劉德華填詞的新歌《我在意》時，見到二人在台下，即興地叫二人上台。「你哋有聽過嘛，識唔識唱㗱？一係，你哋上嚟個台，我兜口兜面唱畀你聽，唔識唱就企喺度等我唱畀你聽。」

三位在台上締造經典畫面，合唱新歌，而劉德華更在台上，表示代表現場所有人，當眾向譚詠麟說︰「我求你吖，你繼續唱啦，求下你。」更借用歌名加多兩錢肉緊︰「我在意㗎，大家都在意。」而當唱到最後一句「最重要」時，華仔跟校長一個眼神交流，就令校長失守唱不下，只能哽咽地完成，並指住華仔笑說︰「寫啲咁嘅嘢！」此刻華仔亦流下男兒淚。更帶住淚水再向校長講一次︰「求下你吖！」

校長又提到當年因為華仔有22套片約在身，經理人公司要校長以前輩身份，勸華仔遲一點才唱歌，拍多些戲為首要。譚詠麟︰「當時我同佢講，如果你一定要唱嘅話，你一定一定一定要好勤力，竟然呢條友仔係勤力過我呀！」此刻華仔又打蛇隨棍上︰「咁你為咩事係最後一次啫，你努力啲啦，睇下幾時贏我！」此刻李克勤又幫口︰「你有話最後一次咩？唔係講下啫咩？」最後三人難捨難離，在譚詠麟提議下合唱《朋友》，更承諾華仔12月演唱會時，會做嘉賓，跟他合唱由自己作曲的《下雨晚上》。