《啪啪聲太好聽》換血 梁梓禧阿旦搵真銀talk騷要延期
由梁梓禧(Roland)及鄧洢玲(阿旦)主持的性話題節目《啪啪聲太好聽》即將換監製，兩個主持做到8月6日亦會隨之被飛，但據知Roland同阿旦早在1個月前已plan好合作搞talk show搵真銀，點知被out即時陣腳大亂，talk show被逼延期舉行。
《啪啪聲》大膽以性做話題，是ViuTV有收視有口碑的節目之一，而早在監製離巢之前，有主辦商主動找Roland同阿旦合作搞talk show，題材當然都係講性，預計7月28、29日開騷，但由於兩人都不是ViuTV合約藝人，故此出外搵真銀一事並無通知ViuTV。
點知《啪啪聲》轉監製之後，新監製阿花決定大改革，Roland同阿旦冇得留低，換入卓韻芝、彭浩翔和專家Dickson，連節目形式都大改。過往會請專家探討每個性話題，而新形式則只靠3個主持齋吹；日前梁梓禧就在facebook貼文：「集集節目keep住有足夠research，又有專家分析，節目開心講sex得嚟，整體品味平衡得適宜。絕對唔係齋吹水冇營養講完就算既（嘅）talk show lor。」似乎希望節目有養份多啲！
而他們錄影的節目將會播到8月6日，Roland接受《香港01》訪問時表示連talk show都要延期：「本來定咗場喺7月28、29兩日開騷，但變咗好接近我哋節目最後出街嗰日，我哋唔想有個錯覺，好似節目一完就開售票talk show，好似同電視台打對台咁，我哋都尊重ViuTV，所以考慮過之後決定延期一個月至開騷囉。」他說與ViuTV關係良好，為免不必要的誤會，延期是適當的做法。
星期三他與阿旦為talk show拍攝宣傳照，阿旦在拍攝期間也對《香港01》表示覺得可惜：「呢個節目令我學咗好多嘢，觀眾又接受，有啲唔捨得！」但她說《啪啪聲》的酬勞並不高，所以很高興能夠開talk show搵真銀，不過延期可能影響票房也唯有咁做！