【有線小鮮肉】網上搜尋「靚仔記者」一定搵到佢　黃浩賢夠魅力

今時今日資訊科技瞬息萬變，唔追貼社會時事個Trend，好易就被淘汰，所以返到屋企打開電視，就算唔睇8點半9點半嘅肥皂劇，都要轉過去新聞睇吓社會發生緊咩事，林鄭又公布咗咩新政策。香港市民就慣咗睇大台嘅香港早晨、6點半新聞，又或者全日狂播嘅互動新聞台，但大台新聞成日畀人話佢「是是但但」，又批評話係「CCTVB」，連出名主播趙海珠、林小珍同周嘉儀都離台，記者柳俊江、方健儀同伍家謙又轉行做KOL，大台新聞好似冇咩邊個特別標青。

近期討論區講起新聞男主播，個個都嫌大台嘅主播質素唔夠高，頻頻食螺絲，又投訴多咗好多大陸主播，嫌棄有陣「陸味」，仲大膽講話：「播新聞最緊要就係靚仔，唔靚仔根本唔應該讀傳播！」樣貌嘅嘢其實好主觀，網民就推薦話：「要睇靚仔睇有線啦！」究竟有線記者有幾靚仔？即刻喺Google Search一下「靚仔記者」，又真係搵到個叫黃浩賢（Edwin Wong）嘅有線記者。原來早喺一年前已經有網民發現Edwin個靚仔樣，仲話被佢搞到「錯晒焦點」。一啲都唔誇張，原來網上面一早就有個IG叫「有線小鮮肉」，Edwin喺入面都佔咗差唔多一半嘅相。