Pokemon Go一周年 許廷鏗仲玩緊：多咗好多新精靈吖嘛
撰文：何志衡
出版：更新：
Pokemon Go一周年喇！如果你仲玩緊都幾長情。
+19
大家仲有冇玩緊Pokemon Go呢？呢隻曾經令人茶飯不思、過馬路唔睇車嘅手機遊戲已經一周年喇！上年7月隻game一出，連去書展都係望住部手機唔係睇書，你一定試過！藝人陳柏宇、佘詩曼、許廷鏗、李蘊同楊秀惠都沉迷過，周秀娜仲喺隻game未出之前就開live話帶大家捉精靈，點知惹來網民嬲爆你又記唔記得？
道場爭地盤相信好多人都玩過。
周秀娜上年隻game未出之前聲稱開live試玩，點知係自己扮比卡超，激嬲唔少網民。
當時隻game一出全世界均為之瘋狂，收集道具、捉精靈、同精靈改名、升呢、打道場，去到邊捉到邊，筆者當時都有玩，仲記得夜媽媽都唔願返屋企，同一班三唔識七嘅後生仔狂奔兩條街搵煙花，一見精靈出沒即急停狂拋波，捉到珍貴精靈唔理大廈有人淋水照大叫「Yes」，這些日子令所有打工仔得到慰藉，又令宅男宅女知道世界有幾大，可以話改變咗全人類嘅生態。
話咁快隻game已經一周年，當時沉迷過嘅藝人仲有幾多個玩緊呢？許廷鏗原來仲玩緊喎：「我得閒都仲會開下嘅！」佢又補充：「啲朋友有玩嘅時候，啱啱附近有隻咩喎，咁我又未有咪開嚟捉下，因為多咗好多新嘅精靈吖嘛，之前又儲開，又未算好嘥時間咪儲下囉！」而新婚冇耐嘅陳柏宇就話：「冇玩好耐喇！」另外莊思敏玩咗一個月就冇玩：「都儲咗百幾隻精靈㗎！但係玩咗一個月就冇玩喇！（咁捨得？）我又冇打道場，冇所謂啦game之嘛。」唉！人類真係貪新忘舊呀！
玩Pokemon Go其中一樣最開心嘅係可以幫精靈改名。
許廷鏗話間中仲會玩Pokemon Go，仲知道多咗好多新精靈添。
陳柏宇可能掛住照顧老婆冇玩Pokemon Go喇！
莊思敏只係玩咗一個月就冇玩。