【任噏亂評】動物傳心好鬼流？ 幾個著名成功例子嚇親你
撰文：郭敏玲
出版：更新：
最近有單新聞講動物傳心，用一隻喺淘寶廿幾蚊就買到嘅膠龜，當眾踢爆幾個聲稱自己有幾乜乜物物認可嘅動物傳心師。香港人睇人尷尬最開心，有唔少人睇完條片，都話睇住傳心師呆咗個樣真係好好笑。不過當然喇，動物傳心呢家嘢，就係因為新聞實證咗唔work，所以都係睇完嚇一跳，然後得啖笑。之但係諗諗下，動物傳心乜真係唔work咩？唔係喎…真係有幾個著名嘅動心傳心成功例子，到而家仲膾灸人口㖭㗎喎，好多人仲好buy。不如講下呢幾個case，你哋睇下係咪咁堅喇！
神鵰就咁睇，好似人咁。（網上圖片）
驚世例子：楊過與神鵰
我敢講，如果冇神鵰，楊過應該悶死咗。自從小龍女墮崖之後，「如何面對，曾一起走過的日子？」好在有神鵰！至少唔係一個人傻下傻下咁過日晨，個套玄鐵神劍都係楊過日日同神鵰對打咁練成，打到楊過以「鵰兄」稱呼，簡直情同手足，好勵志感人。你話神鵰識武功好鬼勁？我就覺得楊過仲勁，如果唔係識讀心，隻雀用劍發來發去我真係識條鐵咩！所以話，呢個case真係舉世聞名，楊過就係咁樣成材！
飛啊飛～（網上圖片）
你睇，有福同享，有難同當呀～係愛呀～（網上圖片）
震驚13億人：唐三藏與徒弟
睇西遊記，其實除咗天庭嘅人同唐三藏，其他角色幾乎都係動物，就算孫悟空同豬八戒，唔好忘記同埋唔好畀佢哋呃到！佢哋都只係馬騮同豬嚟，只不過係擬人化咗啫！唐三藏真係好勁，除咗可以同動物有正常溝通之外，孫悟空曳曳唔聽話？喃嘸喃嘸咁唸緊箍咒，呢招真係動物傳心嘅最大技呀！仲唔係最佳例子？
唐僧係出色嘅動物傳心師。（網上圖片）
連黃子華都叫小強做大佬，動物威力好大呀～（網上圖片）
貼地例子：黃子華同小強
黃子華都識動物傳心術㗎！佢同小強稱兄道弟，仲用個玻璃樽裝住，好似住緊豪宅咁㗎。雖然隔住個樽，但都無阻佢讀心嘅能力，晚晚同小強吹水都得，friend到黃子華都要出返首歌，歌頌佢大佬…「人強不需要馬壯，不需要包裝，我有小小強～」
仲係報時器。（網上圖片）
fire！！（網上圖片）
西域例子：龍母與龍
有睇《權力遊戲》都知，龍母真係當代代表女性，除咗有樣有身材，仲可以掌控巨龍，呼之則來，揮之則去，仲成日騎住條龍周圍走。咁又係嘅，都可以統帥萬軍囉，有咩理由連條龍做咩都唔知先？識讀心㗎嘛！好似係。
可以令條龍貼貼服服，龍母真係勁。（網上圖片）