【都市閒情】安德尊迫宋芝齡食熊貓零食 硬食谷到面都紅晒

撰文:李妍樺
出版:更新:

唔知大家有幾耐冇睇過《都市閒情》,又或者其實根本冇睇過,《都市閒情》係一個集健康、烹飪、生活一身嘅消閒節目,喺午間新閒之後播出,大家最有印象可能係李錦聯教煮餸,絕對係每個家庭主婦日日必睇節目。但之前李錦聯都已經宣佈約滿唔喺TVB度繼續做,其實《都市閒情》都變咗好多,主持鐵膽已經換咗做安德尊、宋芝齡、林淑敏、姚嘉妮、章志文、蘇晉霆,節目喺暑期呢個黃金檔仲有新搞作,逢星期四有個新專題叫《安齡暑假冇時停》,由安德尊同宋芝齡好似Mentor咁,帶住一眾90後新星做暑期工,有啲似綠葉版嘅《打工捱世界》。

呢個組合都幾有新鮮感啊!(網上截圖)
+6

尋日嗰集就講到佢哋帶住香港小姐出身嘅張寶兒同香港先生亞軍丁子朗,去海洋公園做「大熊貓護理員」,學吓點樣準備食物畀熊貓,要佢哋分兩隊估熊貓係食得邊啲蔬菜,張寶兒同丁子朗好彩撞中答案,得到嘅獎品就係熊貓零食,個外表睇落就有啲似「便便」咁,丁子朗望都冇望就擺落口試:「似冇味嘅麥片,都幾好食啊!」,呢個時候安德尊就出嚟抽水讚宋芝齡:「你今次係最醒啊,輸得好!」宋芝齡本身都鬆一口氣,點知安德尊轉個身就搵隻手臂夾住佢,係呁質佢食呢個熊貓零食,「宋芝齡佢鍾意食呢啲㗎,畀佢食!」宋芝齡當堂面都紅晒,其實大家都唔駛擔心,護理員解釋呢個高纖維餅乾,裡面有纖維同蛋白質幫助消化,對人體係無害嘅,辛苦你喇宋芝齡。

宋芝齡真係好慘。(網上截圖)
+4
其實係好有益嘅,不過個樣就......(網上截圖)