【ViuTV】節目爆主題樂園靈異事件好驚驚 阿旦：有嗰味嘢幾刺激
主題樂園有鬼？幻覺嚟㗎啫嚇我唔到嘅！但係呢啲鬼故出自主題樂園員工把口又真係幾驚！星期四ViuTV節目《又要威又要戴頭盔》請咗4位主題樂園員工做嘉賓，分享咗幾個樂園入面嘅鬼故，但係佢哋分享嘅其實只係冰山一角，識睇要睇留言，原來仲有好多傳聞㗎！媽呀，我買咗全年票仲去唔去好呀？
員工分享最恐怖係講樂園裡面黑媽媽個過山車，途中經過一個會轉嘅星球，傳聞有人見過一個小朋友坐咗喺上面，仲同旅客揮手，有唔少客人都話親眼見過，萬聖節期間有客人向員工講：「點解將啲布景接到咁逼真，嚇死我喇！」又有傳聞話負責維修嘅人兄聽到頂處有妹妹哼《快樂頌》，《快樂頌》點唱？自己google下。
另一個都係發生喺好受歡迎嘅遊樂設施，就係坐住車仔玩嘅射擊遊戲，員工話呢個遊戲每卡車只可以坐兩個人，但相傳有一對情侶玩玩下多咗個小朋友，但只得出口員工睇到，個小朋友仲做出「噓」的手勢示意員工唔好出聲，更講咗句：「我都只係想玩下啫，你唔出聲咪得囉！」該員工嚇到呆咗唔敢出聲，兩個入三個出，真係好驚呀。另外有個以獅子為題材嘅真人表演騷，每逢發現最上層有黑影出現的話，個騷就會壞機，表演被逼停止。
唔好以為新起嘅設施就冇事，員工提到一個以博物館為主題嘅遊覽設施都有恐怖經歷，事件發生喺某晚樂園關門後，客人都離開了，而負責拉閘的店鋪職員將閘拉到一半的時候，聽到一班小朋友衝過來的哈哈聲，佢就停止拉閘，但等咗陣唔見有人以為自己聽錯，點知繼續落閘時又再聽見嘈吵聲，於是佢透過閘縫望入去，就見到一班小朋友一字排開，但係全部只得一隻腳。
好驚？仲未完呀！森林主題區有大樹屋，平時客人上樹頂參觀都會經過一隻假豹，假豹身上設有感應器，有人經過便會吼叫；有次樂園關門後一位維修人員上去檢查，感應器正常，但當佢離開嘅時候，突然聽到隻豹吼叫，佢回頭望，見到一名紅衣女子喺橋對岸望住佢，嘩好恐怖呀！後來呢位維修人員辭咗職。
4個傳聞都發生喺唔同嘅遊樂設施，咁我哋避開呢幾個設施咪唔驚囉！你又錯喇！節目播出後，有網友喺ViuTV網頁留言表示喺樂園有怪異經歷，最邪係坐船欣賞世界各地風俗嘅遊樂設施，有人發現有公仔一直望實佢，直到隻船駛到另一區仍然望住佢。又有疑似員工指上節目嘅都只係新員工，好多經典怪事都未知，例如門口水池凌晨發生過怪事，連酒店、canteen、office都有鬼故。唔通樂園真係咁猛？分分鐘刺激過隔離樂園個萬聖節喎！
ViuTV嘅阿旦鄧洢玲都好鍾意去呢個主題樂園，連美國最大嗰個樂園都去過，佢話睇完節目都覺得驚，但越驚越想玩喎：「有嗰味嘢都幾刺激吖！樂園入面有啲恐怖遊戲，玩玩下見到鬼咪更加逼真，又唔知係真嘢！」阿旦仲話：「其實邊度都有鬼㗎啦！有啲生前可能冇錢去玩，死後唔使錢吖嘛，去流連下都唔出奇。」