【任噏亂評】《阿爺廚房》逼住睇譚玉瑛做主持　有得揀你會點揀？

香港人最鍾意飲飲食食，所以大台嘅綜藝節目都離唔開去煮嘢食同去旅行，前幾日爆紅嘅《阿爺廚房》Season2終於開播，之前上季個個都彈譚玉瑛可能做得兒童節目多，時不時都在鼎爺（李家鼎）煮餸嗰陣插嘴講嘢，網民就鬧爆話佢好嘈，網上仲流傳拍嗰時鼎爺都忍唔住爆粗鬧譚玉瑛，最後要靠後期剪走。究竟係真定係假就冇人知，鼎爺多次接受訪問都話佢哋兩個合作好愉快，但無論網民點鬧，第2季都繼續用返譚玉瑛，唔通真係冇得揀？

一講起大台烹飪節目，就會諗起雞汁May姐、淑儀姐、肥媽、鼎爺又或者李錦聯，肥媽因為拍《食平D》同陸號（陸浩明）合作，仲Friend到上埋契，都算係最成功嘅一個組合，而李錦聯同大王（安德尊）因為做《都市閒情》主持時成日鬥嘴，畀製作人睇中搞咗個叫《區區開伙》，睇嗰陣都覺得佢兩個「戲假情真」。

如果個天俾個機會我返轉頭嘅話，我會將佢哋幾個大兜亂，肯定會好有火花！

食花生首推：鼎爺X安德尊

鼎爺雖然刀功好厲害，但佢嘅脾氣都唔惹小㗎，就好似楊千嬅首歌咁：「別人都知道我火爆，直行直橫不守禮貌」，鼎爺唔做作有嗰句就會講嗰句，但大家就係鍾意佢直腸直肚嘅性格，仲覺得佢好Man添！而安德尊唔知係咪節目效果，成日都見佢撩事鬥非，作威作福咁，上禮拜喺《安齡暑假冇時停》度大蝦細，係咁質宋芝齡食熊貓零食，搞到宋芝齡塊面谷到紅晒，網民個個就鬧爆叫TVB裁員第一個就要裁走佢！鼎爺火爆性格，遇上安德尊撩事鬥非，現場肯定火藥味好重，但兩個都係老前輩，都唔知幫邊個，打個和啦，到時節目出街肯定不停消音，係咁「嘟」、「嘟」、「嘟」......

爭嘢講推介：肥媽X譚玉瑛

譚玉瑛喺兒童節目四朝元老，主持過《430太空梭》、《閃電傳真機》、《至NET小人類》、《放學ICU》，橫跨70後80後、90後嘅童年回憶，大家諗起以前睇兒童節目，腦海都仲有譚玉瑛把聲，真係好洗腦！《阿爺廚房》大家彈佢太嘈成日搶住講，其實佢做咗幾十年主持，講慣嘢都好正常嘅，而肥媽喺《食平唔知幾多個D》入面，又係做主Key講嘢，成日都聽到佢把聲係咁窒陸號，充斥成個節目呀真係！如果肥媽同譚玉瑛一齊主持，肯定兩個會係咁爭嘢，當肥媽覺譚玉瑛太嘈嘅時候，對住佢用巨肺唱一句：「嘥氣……」，都應該幾搞笑。

Dead Air推介：李錦聯X陸號

李錦聯本身喺《都市閒情》教煮餸，其實都好低調，每日好公式化咁教大家煮幾個家常便飯，但就係因為大王成日撩佢，兩個互窒就變得好有火花，但單獨睇佢一個呢，就真係冇咩味道，佢係一個需要人帶動嘅綠葉角色。而陸號同李錦聯一樣，都係需要有人同佢唱雙簧，即係肥媽鬧佢一句，佢又笑笑口厚面皮去氹肥媽，如果冇咗肥媽係度，陸號自己一個講嘢畀人感覺就好油腔滑調，成件事會好Over。如果將李錦聯同陸號擺埋一齊，冇咗個主Key帶住，我估佢哋都會好客氣咁等大家講嘢，成件事會好尷尬，但睇佢哋瘋狂Dead Air都幾有趣味性。

其實都係FF吓，大家都係準時十點半睇返鼎爺同譚玉瑛嘅《阿爺廚房》啦。