杜汶澤破解阿嬌語言藝術 「個個都美顏，唔通個個都想美顏咩!」
撰文：何志衡
出版：更新：
鍾欣潼(阿嬌)早幾日好似飲醉酒咁講咗番說話：「個個都拍拖，唔通個個都想拍拖咩？」當日喺旁邊嘅張智霖都聽到呆咗！但係呢番咁高深嘅說話就俾杜汶澤破解咗喇！
杜汶澤索性自己改圖自娛一番。
杜汶澤一句:「個個都美顏,唔通個個都想美顏咩!」就抽咗阿嬌水。
阿澤喺fb貼文話：「各位街坊如果同我合照可唔可以唔用美顏apps，白X到藝妓（伎）回憶錄咁，阿媽我好驚呀！個個都美顏咖啦！個個都美顏，唔通個個都想美顏咩！」明唔明？即係個個都想執靚個樣，但係阿澤就唔想執到藝伎咁樣樣囉！
陳貝兒改圖技能原來幾高超。
阿澤回覆留言時係咁意解釋咗件事，係有粉絲同佢合照之後，即場喺佢面前美圖秀秀，將佢塊面變白。嗱識睇一定睇留言，張栢芝就留言話：「笑到芹菜」阿澤回覆：「啊天皇巨（星）你懂的」。
張栢芝都留言，但係笑到芹菜係點解呢？
乜嘢係《藝伎回億錄》？係章子怡主演㗎。
陳貝兒仲勁，將阿澤個樣key落賀年娃娃度仲留言話：「對唔住呀我唔知原來你唔鍾意萌萌噠」阿澤仲搞笑：「點解你會有我張中學畢業相咖」。
杜汶澤自己都唔執輸玩埋一份，將自拍照執到白臉、V面、大眼嚟回應大家，又另外執咗張自己同古天樂嘅合照，將皮膚黑黑嘅古天樂執到接近白色，玩到好盡！
阿澤連古天樂都玩埋，不過古仔未有留言回應。